पोखरा । नेकपा माओवादी केन्द्रको पोखरा महानगर कमिटी अध्यक्षमा हरिनारायण गिरी (विज्ञान) निर्वाचित भएका छन् । बिहीबार भएको भेलाले गिरीको अध्यक्षतामा नयाँ कमिटी तयार गरेको हो ।
तोकिएको समयभन्दा ३ महिनापछि कमिटी गठन भएको हो । धेरैले आकांक्षा देखाएपछि महानगर अधिवेशन स्थगित भएको थियो । प्रदेश र केन्द्रको अधिवेशन सकिएपछि आकांक्षी धेरै नेताहरु माथिल्लो कमिटीमा गएका कारण अहिले सहज भएको माओवादी नेताहरु बताउँछन् ।
कमिटी उपाध्यक्षमा भानुभक्त अधिकारी, पुष्पकमल ढुंगाना र हर्कमान बिक चयन भएका छन् भने सचिवमा जनकराज सुवेदी छानिए । यस्तै, सहसचिवमा विमला पहारी र कोषाध्यक्षमा सूर्यप्रकाश तिवारी सर्वसम्मत चयन भएको महानगर इन्चार्ज दीपक कोइरालाले जानकारी दिए । उनका अनुसार अहिले ८३ सदस्यीय कमिटी तयार भएको छ । माओवादी विधानमा ९९ सदस्य हुने व्यवस्था छ । बाँकी सदस्य मनोनीत गरिने उनले बताए ।
योसँगै गण्डकी प्रदेशमा अब ३ वटा पालिकामात्रै अधिवेशन हुन बाँकी छ । कास्कीका माछापुच्छ«े र अन्नपूर्ण गाउँपालिका तथा गोरखाको पालुङटार नगर कमिटी गठन हुन बाँकी रहेको माओवादी गण्डकीले जनाएको छ । त्यसो त प्रदेश कमिटी पनि पूर्ण भएको छैन । अध्यक्षमा गायत्री गुरुङलाई चयन गरेपछि अधिवेशनको बाँकी काम स्थगित छ । माओवादीको संशोधित विधान अनुसार अहिले जिल्लालाई कार्यकारी अधिकार छैन । यद्यपि जिल्ला संयोजन समिति भने रहनेछ । जिल्लामा कार्यक्षेत्र भएका प्रदेश कमिटी सदस्य र पालिका पदाधिकारी तथा मनोनीत २० प्रतिशत रहेको संयोजन समिति हुनेछ भने उक्त कमिटीको नेतृत्व प्रदेशले टुंगाउने छ ।