लमजुङ । लमजुङमा आयोजना गरिएको बाघचालको दोस्रो खुला प्रतियोगितामा आशबहादुर विक पहिलो भएका छन् । ठाडोभाका लोककला प्रतिष्ठान नेपाल लमजुङले आफ्नो छैंटौ स्थापना दिवसका अवसरमा प्रतियोगिताको आयोजना गरेको हो ।
ठाडोभाकाका सर्जक देउबहादुर दुराको जन्मथलो मध्यनेपाल नगरपालिका १० को हाँडीखोला, बर्धन गाउँमा सञ्चालन गरिएको प्रतियोगितामा राइनास नगरपालिका १० प्यारजुङ गाउँ विक प्रथम भएका हुन् । पहिलो संस्करणमा उनी तृतीय भएका थिए ।
मध्यनेपाल नगरपालिका– १० वर्धन गाउँका रामबहादु दुराले दोस्रो भएको प्रतियोगिताको निर्णायक समितिका संयोजक तथा आयोजक संस्थाका आजीवन सदस्य रमाराज खनियाले बताए । उनका अनुसार सोही गाउँका पूर्णबहादुर दुरा तृतीय भए भने भीमबहादुर दुरा सान्त्वना स्थानमा रहे ।
प्रतियोगितामा कुल ४९ जनाले भाग लिएको आयोजक संस्थाका अध्यक्ष नवराज पहाडीले जानकारी दिए । उनका अनुसार विजेताहरुलाई नगद पुरस्कार र प्रमाणपत्र प्रदान गरिएको थियो । प्रतियोगितामा प्रथम, द्वितीय, तृतीय र सान्त्वना हुनेले क्रमश ७ हजार, ५ हजार, ३ हजार र २ हजार रुपैयाँ प्राप्त गरे ।
विजयीहरूलाई भूमि आयोग लमजुङका अध्यक्ष दामोदर अधिकारी र प्रमुख जिल्ला अधिकारी सुशील वैद्यले संयुक्त रुपमा पुरस्कार र प्रमाणपत्र वितरण गरेका थिए । प्रतियोगिता ३ दिनसम्म चलेको थियो । ४, ५ दशक अघिसम्म बाघचाल खेल्नु गाउँघरमा गोठालो जाँदा र अघिपछि फुर्सदको समयमा बाघचाल खेल्ने परम्परा बसेको भए पनि पछिल्लो पुस्ताले बाघचालको नाम समेत बिर्सने स्थिति भएको हुँदा यसको संरक्षण र प्रवद्र्धनका लागि प्रतियोगिताको आयोजना गरिएको आयोजक प्रतिष्ठानका संरक्षक एवं ठाडोभाका महानायक बुद्धमान दुरा ‘घम्पु’ले बताए ।