पोखरा । कप्तान अमृत गुरुङको अर्धशतकीय पारी र तीव्रगतिका बलर कृष्ण पौडेलको ४–१–१३–३ को बलिङ स्पेसले राइजिङ क्रिकेट क्लबले सांग्रिलालाई ९ रनले पराजित गरेको छ ।
टि–२० कास्की जिल्लास्तरीय क्लब च्याम्पियनसीपअन्तर्गत मंगलबार टस जितेर व्याटिङमा उत्रिएको राइजिङले कप्तान अमृत गुरुङले ५२ रनको अर्धशतकीय कप्तानी पारी खेले । राइजिङले ८ विकेटको क्षतिमा १ सय १६ रनको योगफल तयार पार्दै सांग्रिला क्रिकेट क्लबलाई लक्ष्य पछ्याउने चुनौती दियो । ३ विकेट सस्तैमा गुमाएपछि धर्मराएको राइजिङलाई उकास्ने काम भने कप्तान गुरुङले गरे । पाँचौ नम्बरमा आएको कप्तान गुरुङले चौथो विकेटको लागि नवीन पोखरेलसँग ६० रनको साझेदारी गरे ।
कास्की जिल्ला क्रिकेट संघको आयोजनामा भएको प्रतियोगितामा कप्तान गुरुङले ५२ रन हिर्काउन ३१ बलको सामना गरे । उनले ४ चौका र २ छक्का हिर्काए । नवीन पोखरेल र सागर लामिछानेको समान १३ रनको योगदान रह्यो । खेलमा अमृत गुरुङ अफ दि म्याच घोषित भए ।
दोस्रो खेलमा पोखरा क्रिकेट क्लबले अरण्यज्योति क्रिकेट क्लबलाई ८ विकेटले पराजित गर्दै शीर्षस्थानमा उक्लिएको छ । अरण्यज्योतिले पहिले व्याटिङ गर्दैै १९.४ ओभरमा सबै विकेट गुमाउँदै ८१ रन बनाएको थियो । कप्तान विधान श्रेष्ठले ३७ बलमा १ चौका र १ छक्काको मद्दतमा ३१ रन जोडे । प्रवीन पौडेलले पनि २७ रन बनाउने क्रममा ४५ बल खेले ।
८२ रनको लक्ष्य पछ्याएको पोखराका तर्फबाट अनिल गुरुङले ५१ रन बनाउँदै अविजित खेलेपछि अरण्यज्योतिलाई ८ विकेटले पराजित गरेको हो । प्लेयर अफ दि म्याच अनिलले २७ बलमा ६ चौका र २ छक्का हिर्काए । प्रमोद बास्तोलाले १ चौका सहित १४ रन हिर्काए । मुस्कान थापा ११ रन जोडे । विधान श्रेष्ठ र दिवस गिरीले समान १÷१ विकेट लिए । पोखरा क्रिकेट क्लब र राइजिङ दोहोरो जितसँगै समान ४ अंक जोडेका छन् । यद्यपि नेटरनेटमा पोखरा क्रिकेट क्लब लिगको शीर्षस्थानमा छ ।