म्याग्दी । पर्वतको जलजला गाउँपालिका ७ मिलनचोकमा निशुल्क स्वास्थ्य शिविर सञ्चालन गरिएको छ । अन्तर्राष्ट्रिय पर्वत समाजको आयोजना र जलजला गाउँपालिका, पर्वत जिल्ला अस्पताल लगायत विभिन्न संघ संस्थाको समन्वयमा शिविर भएको हो । शिविरमा स्त्रीरोग, दन्तरोग र जनरलसम्बन्धी सेवा दिइएको आयोजकले जनाएको छ ।
शिविरबाट १७५ जना महिला र ४० पुरुषले सेवा लिएको समाजकी उपाध्यक्ष तथा कार्यक्रम संयोजक संगीता कुँवर कार्कीले जानकारी दिइन् । निशुल्क स्वास्थ्य परीक्षण, परामर्श र औषधी वितरणसम्बन्धी सेवा दिइएको थियो । शिविरमा स्त्रीरोग विशेषज्ञ डा. अनु हिराचन, धर्मा ढकाल, दन्त चिकित्सक हेमन्त बास्तोला, जनरल चिकित्सक कृष्ण सुवेदी, जलजला गाउँपालिका स्वास्थ्य शाखा संयोजक राजु बोहोरा लगायतले सेवा दिएका थिए । जलजला गाउँपालिकाका मल्लाज, बाँसखर्क, लेकफाँट, शालिजा, धाइरिङ, नाग्लीबाङ, बनौ लगायत स्थानीयबासीहरुले सेवा लिएका थिए ।
आर्थिक समस्याका कारण अस्पताल पुग्न नसकेका ग्रामीण क्षेत्रका सर्वसाधारणलाई लक्षित गरेर शिविरको आयोजना गरिएको समाजकी नेपाल प्रतिनिधि मुना भुषालले बताइन् । शिविरको उद्घाटन गाउँपालिका अध्यक्ष यामबहादुर मल्ल (रामकृष्ण) ले शिविर आयोजना गरेकोमा समाजलाई धन्यवाद दिए । उनले अन्तर्राष्ट्रिय पर्वत समाजले यस अघि पनि कोरोना रोकथाम तथा नियन्त्रण, बाढी पहिरो लगायत विपद् व्यवस्थापन, स्वास्थ्य, शिक्षा क्षेत्रमा गरेको सहयोगप्रति धन्यवाद व्यक्त गरे । नवीन जिसीले सञ्चालन गरेको उद्घाटन कार्यक्रममा पर्वत जिल्ला अस्पताल व्यवस्थापन समितिका अध्यक्ष शंकर गिरीले बोलेका थिए ।