पोखरा । नेस्डो समृद्ध लघुवित्त वित्तीय संस्थाको प्राथमिक सेयर (आईपीओ) बुधबारदेखि बिक्री खुला भएको छ । अंकित मूल्य १ सयका दरले कुल ८ लाख २८ हजार ७५० कित्ता आईपीओ सर्वसाधारण समूहमा बिक्री गर्न लागेको हो । यसमध्ये ५ प्रतिशत अर्थात् ४१ हजार ४३७ कित्ता सामूहिक लगानी कोष र १२ हजार ७५० कित्ता कर्मचारीलाई सुरक्षित गरिएको छ । बाँकी ७ लाख ७४ हजार ५६३ कित्ता सेयर सर्वसाधारणलाई बाँडफाँट गरिने बिक्री प्रबन्धक ग्लोबल आईएमई क्यापिटलले जनाएको छ ।

सर्वसाधारणले फागुन १५ गतेसम्म आवेदन दिन सक्नेछन् । न्यूनतम १० कित्तादेखि अधिकतम १ हजार कित्तासम्मका लागि आवेदन दिन सकिनेछ । आफ्नो खाता रहेको बैंक तथा वित्तीय संस्थाका जुनसुकै शाखा कार्यालयबाट आवेदन दिन सकिनेछ । साथै सीडीएससीको अनलाइन प्रणाली ‘मेरो सेयर’ मार्फत पनि आवेदन दिन सकिनेछ ।

हाल कम्पनीको चुक्ता पुँजी १७ करोड २१ लाख २५ हजार रहेको छ । आईपीओ बाँडफाँड पश्चात चुक्ता पुँजी २५ करोड ५० लाख पुग्नेछ । आर्थिक वर्ष ०७६र७७ सम्म कम्पनीको प्रतिसेयर आम्दानी ५६ रुपैयाँ ८७ पैसा छ । पर्वतमा मुख्य कार्यालय रहेको कम्पनीको प्रतिसेयर नेटवर्थ आव ०७६र७७ सम्म २६० रुपैयाँ छ । इक्रा नेपालले कम्पनीलाई ‘बीबी प्लस’ रेटिङ प्रदान गरेको छ । यसले कम्पनी वित्तीय दायित्व वहन गर्ने क्षमतामा मध्यम जोखिम रहेको जनाउँछ ।