पोखरा । महिला उद्यमशीलता, क्षमता वृद्धिको लागि जुत्ता चप्पल बनाउने तालिम सुरु भएको छ । जाल्पादेवी महिला उद्धार समूह सिमलचौरको आयोजना तथा पोखरा महानगरपालिका वडा ८ को सहयोगमा स्थानीय महिलाका लागि मंगलबारदेखि तालिम सुरुआत गरिएको समूहका अध्यक्ष राधिका थापाले बताइन् । तालिम एक सातासम्म चल्नेछ ।
तलिम उद्घाटन गर्दै वडाध्यक्ष रुद्रनाथ बरालले वडामा रहेका महिलालाई आत्मनिर्भर गराउने उद्देश्य अनुसार १ हजार १ सयभन्दा बढीलाई विभिन्न तालिममा सहयोग गरिंदै आएको बताए ।
कार्यक्रममा वडा सदस्य कृष्णमान ठुसाजु, किरण गौतम, सृजना विकास केन्द्रका उपाध्यक्ष कृष्णबहादुर थापा, जाल्पादेवी टोल समितिका अध्यक्ष विश्वकुमार विजुक्छे, सृजना महिला सहकारीका अध्यक्ष सुष्मा पहारी, संस्थापक अध्यक्ष शारदा सुवेदी, पूर्व अध्यक्ष पवित्रा केसी लगायतले तालिममार्फत समूह पहिचान गरी व्यावसायिक उत्पादन गर्नुपर्नेमा जोड दिए ।
समूह अध्यक्ष राधिका थापाको अध्यक्षतामा सम्पन्न कार्यक्रममा प्रशिक्षक गोविन्द नेपाली, उपाध्यक्ष दुर्गा अधिकारी, सचिव अमृता गिरीले तालिमको महत्वबारे बोलेका थिए । २०५३ सालमा स्थापित समूहमा ५ सयभन्दा बढी महिला सदस्य छन् । संस्थाले शिक्षा, स्वास्थ्य लगायत विभिन्न तालिम गर्दै आएको छ ।