पोखरा । पोखरा रंगशालामा जारी रेवान पोखरा भेट्रान्स टेनिस प्रतियोगितामा भीष्मराज पौडेल र राजेश गुरुङ नवप्रवेशीतर्फ फाइनल प्रवेश गरेका छन् । सोमबार भएको सेमिफाइनलमा भीष्मले दुर्गा सुनारलाई ६–२, ६–३ ले तथा राजेशले रविन गुरुङलाई ६–२,६–० ले पराजित गर्दै फाइनलमा स्थान बनाएका हुन् ।
कास्की जिल्ला टेनिस संघको आयोजना तथा रेवान पोखराको मुख्य प्रायोजनमा जारी प्रतियोगिताको नवप्रवेशीतर्फको फाइनल मंगलबार हुनेछ ।
त्यस्तै सिनियर भेट्रान्सतर्फका खेलहरु पनि मंगलबारदेखि नै सुरु हुने आयोजक संघ कास्कीका सचिव नवीन श्रेष्ठले जानकारी दिए । नवप्रवेशीतर्फ सेमिफाइनल पुगेका भीष्मराज पौडेल, रविन गुरुङ, दुर्गा सुनार र राजेश गुरुङले पनि सिनियरतर्फ भाग लिन पाउने भएका छन् ।
खुला एकलतर्फका विजेताले १५ हजार तथा दोस्रो हुनेले नगद ७ हजार ५ सयसहित ट्रफी पुरस्कार प्राप्त गर्नेछन् । डबल्सतर्फ विजेताले नगद १० हजार तथा उपविजेताले नगद ५ हजारसहित ट्रफी पुरस्कार प्राप्त गर्नेछन् । नवप्रवेशीतर्फका विजेता र उपविजेताले ट्रफी पुरस्कार प्राप्त गर्नेछन् ।