स्याङ्जा । स्थानीय तहको निर्वाचन वैशाख ३० का लागि तोकिएको छ । निर्वाचन नजिकिएसँगै मतदाता नामावलीमा नाम भएका मतदातालाई लक्ष्य गरी स्याङ्जा जिल्ला निर्वाचन कार्यालयले परिचयपत्र हराएकालाई फागुन २० गतेसम्म निवेदन दिन सक्ने व्यवस्था मिलाएको छ । जिल्ला निर्वाचन कार्यालय स्याङ्जामा आएर निवेदन दिनसक्ने कार्यालयले जनाएको छ ।
जिल्ला निर्वाचन अधिकृत गुरुप्रसाद मरासीनीका अनुसार परिचयपत्र हराएमा, च्यातिएमा वा नष्ट भएमा कार्यालय आएर निवेदन दिन सकिन्छ । कार्यालयमा आउँदा सम्बन्धित वडा कार्यालयको सिफारिस, नागरिकता, मतदाता परिचयपत्रमा उल्लेख भएको नम्बर ल्याउनुपर्नेछ ।
मतदाता परिचयपत्र नबुझिने गरी च्यातिएको भए सोही परिचयपत्र पनि ल्याउनुपर्ने कार्यालयले जनाएको छ । योसँगै जिल्लाका ५ नगरपालिका र ६ गाउँपालिकाका मतदातालाई जानकारीका लागि सूचना सार्वजनिक गरिएको उनले जनाए ।
कार्यालयका अनुसार आर्थिक वर्ष सुरु भएसँगै यहाँ १८ हजार नयाँ मतदाता थपिएका छन् । जिल्ला निर्वाचन कार्यालय र जिल्ला तथा इलाका प्रशासन कार्यालयमा भइरहेको मतदाता नामावली दर्ता कार्य स्थानीय तह निर्वाचन घोषणासँगै निर्वाचन आयोगको निर्देशनअनुसार हाल स्थगित छ ।
मतदानको अघिल्लो दिन अर्थात् वैशाख २९ गतेसम्म १८ वर्ष उमेर पूरा भएकाले किशोर किशोरीले मतदान गर्न सकिने नयाँ व्यवस्था छ । यसअघि भने निर्वाचन घोषणाका दिन १८ वर्ष पूरा भएको हुनुपर्ने प्रावधान थियो ।