पोखरा । कास्की जिल्ला टेनिस संघको आयोजना तथा रेबान पोखराको मुख्य प्रायोजनमा पोखरा रंगशालामा आइतबारदेखि रेबान पोखरा भेट्रान्स टेनिस प्रतियोगिता–२०७८ सुरु भएको छ । प्रतियोगिताअन्तर्गत नवप्रवेशी भेट्रान्सतर्फ भीष्मराज पौडेल, रवीन गुरुङ, दुर्गा सुनार र राजेश गुरुङ सेमिफाइनलमा प्रवेश गरेका छन् ।
रवीन गुरुङले विष्णु थापालाई प्रतिस्पर्धात्मक खेलमा २–६, ७–६ र सुपरटाइमा ११–९ ले पराजित गरे । त्यस्तै दुर्गा सुनारले सुजन तिवारीलाई ६–१, ६–२ ले तथा राजेश गुरुङले निर्मल सिल्पकारलाई ६–०, ६–२ ले पराजित गर्दै सेमिफाइनलमा स्थान बनाएका हुन् । भीष्मले बाई पाएर सिधै सेमीमा प्रवेश पाए । सोमबार हुने सेमिफाइनलमा भीष्मले दुर्गासँग तथा राजेशले रवीनसँग प्रतिस्पर्धा गर्नेछन् ।
प्रतियोगिताअन्तर्गत सिनियर भेट्रान्सतर्फको खेल मंगलबारदेखि सुरु हुने प्रतियोगिता संयोजक नवीन श्रेष्ठले जानकारी दिए । प्रतियोगितामा खुला एकलतर्फका विजेताले नगद १५ हजार तथा दोस्रो हुनेले नगद ७ हजार ५ सयसहित ट्रफी पुरस्कार प्राप्त गर्नेछन् । डबल्सतर्फ विजेताले नगद १० हजार तथा उपविजेताले नगद ५ हजारसहित ट्रफी पुरस्कार प्राप्त गर्नेछन् । नवप्रवेशितर्फका विजेता र उपविजेताले ट्रफी पुरस्कार प्राप्त गर्नेछन् ।