लमजुङ । लमजुङमा राष्ट्रिय प्रजातन्त्र दिवसका अवसरमा युगल ब्याटमिन्टन प्रतियोगिता सञ्चालन गरिएको छ । राष्ट्रिय प्रजातन्त्र दिवस मूल समारोह समिति लमजुङको आयोजना तथा जिल्ला खेलकुद विकास समितिको संयोजनमा अन्तर सरकारी कर्मचारी, जनप्रतिनिधिका बीचमा प्रतियोगिता गरिएको हो ।
बेंसीसहर नगरपालिका ८ को फूलबारी मञ्चमा आयोजना गरिएको युगल ब्याडमिन्टन प्रतियोगिता ३ दिनसम्म सञ्चालन गरिएको हो । प्रतियोगितामा जिल्ला खेलकुद विकास समितिका उपाध्यक्ष गजेन्द्र श्रेष्ठ र कोषाध्यक्ष प्रदपि घिमिरेको जोडी प्रथम भएको छ । जिल्ला प्रहरी कार्र्यालयका चन्द्र गुरुङ र रञ्जन अमगाईंको जोडी द्वितीय भएको छ । प्रतियोगिताको समापन कार्यक्रम निमित्त प्रमुख जिल्ला अधिकारी भूमेश्वर पोख्रेलको प्रमुख आतिथ्यता तथा जिल्ला खेलकुद विकास समितिका अध्यक्ष योगबहादुर गुरुङको अध्यक्षतामा भएको थियो ।
निमित्त प्रमुख जिल्ला अधिकारी भुमेश्वर पोख्रेल तथा प्रनाउ कृष्णबहादुर कार्कीले विजेताहरूलाई पुरस्कार र प्रमाणपत्र वितरण गरेका थिए । प्रथम र द्वितीय हुनेलाई पुरस्कार स्वरुप क्रमश नगद ८ हजार र ४ हजार नगदसहित मेडल र प्रमाणपत्र प्रदान गरिएको छ ।
उक्त प्रतियोगितामा १० टिमले भाग लिएका थिए । सो प्रतियोगितामा बेंसीसहर नगरपालिकाको आर्थिक सहयोगमा गरिएको आयोजक समितिले जनाएको छ । कार्यक्रमको सञ्चालन खेलकुद विकास समिति केन्द्रीय सदस्य दिवाकर बरालले गरेका थिए ।