पोखरा । पोखरा ३० शिशुवाका दीपक थापालाई सवारी चालक अनुमति पत्र (लाइसेन्स) नभएकै कारण निकै गाह्रो थियो । आफ्नै साधन भए पनि उनी कहिल्यै ढुक्कसँग हिँड्न पाएका थिएनन् । घरयासी काम परेर पोखरा आउन पनि उनलाई ट्राफिक छल्दै हिँड्नुपर्ने अवस्था थियो । ३ वर्षदेखि लाइसेन्सकै लागि संघर्ष गरिरेहका उनी एकपटक स्टार्ट अफ भएर र अर्को पटक एटमा फेल भएका थिए ।
उनी आइतबार भने खुसी मुद्रामा देखिन्थे । पहिला एटमा फेल भएका उनी यो पटक एटमै लाइन छुँदा पनि पास भए । यातायात कार्यालयले नयाँ नियम ल्याएका कारण आफू पास भएको उनको प्रतिक्रिया थियो । यातायात कार्यालयले ल्याएको नयाँ नियमले साना साना गल्ती गरेर लाइसेन्सविहीन भएकाहरुलाई सहज हुने उनले बताए । ट्रायल पास भएपछि शिशुवा–पोखरा गर्न कुनै समस्या नहुने उनको प्रतिक्रिया थियोे ।
दीपकजस्तै सामान्य गल्तीका कारण लाइसेन्सविहीनका लागि यातायता व्यवस्था कार्यालय, पोखराले आइतबारदेखि लागु हुने सवारी चालक अनुमति पत्रको लागि ७० अंक ल्याए पास हुने कार्याविधि कार्यान्वयन गरेको छ । यातायात व्यवस्था विभागले परिर्माजनसहित जारी गरेको ‘सवारीचालक अनुमतिपत्र निर्देशिका, २०७७’ गण्डकी प्रदेशमा आइतबारदेखि औपचारिक रूपमा लागु भएको छ । प्रदेशका भौतिक पूर्वाधार, सहरी विकास तथा यातायात व्यवस्थामन्त्री कुमार खड्काले प्रयोगात्मक परीक्षाको एक कार्यक्रमबीच सुरुखात गरेका हुन् । यसअगाडि प्रयोगात्मक परीक्षामा कुनै सामान्य गल्ती भए पनि फेल हुने अर्थात् पास हुन १ सय पूर्णांकमा १ सय नै ल्याउनुपर्ने व्यवस्था रहेकोमा सो नियम परिवर्तन भएको हो ।
भौतिक पूर्वाधार तथा यातायात मन्त्रालयले गत जेठ १ गतेदेखि लागु हुने गरी सवारी चालक अनुमतिपत्र परीक्षा सञ्चालन कार्यविधि निर्देशिका–२०७७ जारी गरेको थियो । संघ र प्रदेशबीचको अन्योलता र २ संयन्त्रबीच समन्वय हुन नसक्दा ट्रायलमा नयाँ व्यवस्था कार्यान्वयनमा आउन सकेको थिएन ।

यो नियम गत जेठ १ देखि लागु हुने भनिए पनि संघ र प्रदेशबीच समन्वय नहुँदा कार्यान्वयनमा थिएन

कार्यक्रममा मन्त्री खड्काले अब सवारीचालक अनुमतिपत्र लिन प्रशिक्षार्थीलाई सहज भएको विश्वास व्यक्त गरे । ४ पांग्रे सवारीको हकमा असार मसान्तसम्म र २ पांग्रेको हकमा दसैंसम्म परीक्षा गरिसक्ने गरी कार्यालयले तयारी अगाडि बढाएकाले त्यसअनुरूप परीक्षा गरी उत्तीर्णलाई लाइसेन्स दिने उनले जानकारी दिए । ७० प्रतिशत ल्याए उत्तीर्ण हुने व्यवस्थाले केही सहजता हुने मन्त्री खड्काको भनाइ छ ।
सवारीचालक अनुमतिपत्र कार्यालय गण्डकी प्रदेशका प्रमुख प्रेम सुवेदीका अनुसार निर्देशिका लागु भएसँगै यो महिनाको सुरु अर्थात् १ फागुनदेखि आवेदन दिएकाको नयाँ व्यवस्था अनुरूप मूल्यांकन हुनेछ ।

यस्तो छ नयाँ नियम

लिखित परीक्षा पास गरेका परीक्षार्थीले ट्रायल दिँदा छुट्टाछुट्टै अंकभार निर्धारण गरिएको छ । पहिलो चरणको घुमाउरो एटको अंकभार २० छ । यसमा २ पटकसम्म अंकित रेखा छोएमा ५/५ अंक काटिनेछ । यसबाहेक यही चरणमा अनुत्तीर्ण हुन पनि सक्छन् । १ पटकभन्दा धेरै अंकित रेखा छोएमा, सवारीको टायर अंकित रेखाभन्दा बाहिर गएमा, ठीक दिशा वा ठीक तरिकाबाट एट नघुमाएमा, अगाडि बढ्ने क्रममा सवारीलाई पछाडि सारेमा फेल हुनेछ ।
त्यसैगरी, दोस्रो चरणको उबडखाबडको अंकभार १० कायम गरिएको छ । यसमा एक पटकसम्म स्टार्ट बन्द भएमा ५ अंक काटिनेछ । यो चरणमा पनि १ पटकभन्दा धेरै स्टार्ट बन्द भएमा अनुत्तीर्ण हुनेछन् । तेस्रो चरणमा यु–टर्नको अंकभार १० छ । यसमा ट्रेनिङ इन्डिकेटर लाइट नबालेमा १० अंक घटाइनेछ । यसमा पनि अंकित रेखा छोएमा अनुत्तीर्ण गरिनेछ । चौथो चरणको ट्राफिक संकेतको अंकभार १५ कायम गरिएको छ । संकेत पालना नगरे १५ नम्बर घटाइए पनि फेल भने नगरिने सवारीचालक अनुमतिपत्र कार्यालय गण्डकी प्रदेशका प्रमुख प्रेम सुवेदीले बताए ।
उकालो÷ओरालोको अंकभार १५ छ । छैटौं चरणमा रहेको ग्यारेज पार्किङको अंकभार २० छ । यसमा सवारीलाई पछाडि गुडाउने क्रममा एक पटकसम्म अगाडि सरेमा १० नम्बर काटिनेछ । त्यसैगरी, सातौं र अन्तिम चरणमा परीक्षार्थीको व्यावहारिक पक्षको समग्र मूल्यांकनका लागि पनि अंकभार कायम गरिएको छ । यसमा सवारी चलाउनुपूर्व ब्रेक, टायर र ऐनाहरूका सामान्य निरीक्षण नगरे, सिटबेल्ट नलगाई चलाएमा ४ र अस्वाभाविक गतिमा वा असंयमित रूपमा सवारी चलाएमा ३ नम्बर काटिनेछ । २ पांग्रे सवारीको ट्रायलका लागि पनि छुट्टै नियम रहेको प्रमुख सुवेदीको भनाइ थियो । धेरै जसो ४ पांग्रेको जस्तै नियम भए पनि केही चरणमा फरक रहेको उनले बताए । परीक्षार्थीहरुको सहजताका लागि अंकभार प्रष्ट देखिने गरी कार्यालय परिसरभित्रै बोर्ड बनाएर राखिएको छ ।