पोखरा । दारी ग्याङको छैटौं वार्षिकोत्सवको अवसरमा दारी ग्याङ पोखराले माछापुच्छ्रे गाउँपालिका ४ मा रहेको देउराली आधारभूत विद्यालयलाई शैक्षिक तथा खेलकुदका सामग्री प्रदान गरेको छ । दारी ग्याङका सदस्यहरुले विद्यालयमा विद्यार्थीहरु माझ केक काटेर आफ्नो वार्षिकोत्सव मनाएको हुन् । कार्यक्रममा दारी ग्याङका सदस्य कलाकार सुमन वाग्लेले चित्रकलामा इच्छुक विद्यार्थीका लागि आवश्यक सामग्री पनि प्रदान गरे ।
कार्यक्रममा दारी ग्याङ पोखराका पूर्व संयोजक वसन्त पहारी, विद्यालय प्रधानानाध्यापक प्रेमलाल पोखरेल, दारी ग्याङ केन्द्रीय कमिटीका सचिव मनोज माली, दारी ग्याङ पोखराका संस्थापक संयोजक शेखर गौतम, विद्यालय व्यवस्थापन समिति अध्यक्ष केशवराज अधिकारी लगायतले बोलेका थिए ।
दारी ग्याङ पोखराका पूर्व संयोजक वसन्त पहारीको अध्यक्षतामा भएको कार्यक्रम सञ्चालन रमेश पोख्रेलले गरेका थिए । फेसबुक समूह दारी ग्याङको स्थापना २०७२ फागुन ६ गते भएको थियो । हालसम्म १ लाखभन्दा बढी युवा सम्मिलित समूह सामाजिक काममा सक्रिय छ ।