पोखरा । नेपाली कांग्रेस पोखरा महानगरका सचिव गणेशबहादुर थापाले नगरवासी मतदातासँग पोखराको समुन्नत विकासका लागि नीति, योजना, कार्यक्रम तथा सुझाव माग गरेका छन् ।
आगामी २०७९ बैशाख ३० मा हुने स्थानीय तहको निर्वाचनमा कांग्रेसले बनाउने घोषणापत्रमा समेट्न उनले सुझाव माग गरेका हुन् ।
बिहीबार सामाजिक संजाल फेसबुकमार्फत स्टाटस पोस्ट गर्दै उनले भनेका छन्, ‘नेपाली कांग्रेसतर्फबाट प्रमुख (मेयर), उपप्रमुख (उपमेयर) सहित ३३ वडाका अध्यक्षमा उम्मेदवार निर्वाचित भएमा नेपाली कांग्रेस, पोखरा महानगरपालिका समिति र निर्वाचित जनप्रतिनिधिले पोखरा महानगरवासीको भलाइ र पोखराको समुन्नत विकासका लागि पूरा गर्नुपर्ने छोटा र दीर्घकालीन ठोस नीति, योजना उपलब्ध गराइदिनुहुन विनम्र अनुरोध गर्दछु ।’
नगरवासीको आवश्यकता र इच्छाअनुसारका नीति, योजना तथा कार्यक्रमलाई नेपाली कांग्रेस, पोखरा महानगरपालिकाले निर्देशनात्मक आदेश मान्दै स्थानीय तहको चुनावी घोषणापत्रमा समावेश गर्ने उनले बताए । जसले गर्दा निर्धारित ५ वर्ष भित्र ती माग कुनै बहानाबिना नै सम्पन्न गर्न दबाब पुग्ने उनको बुझाइ छ ।
कोठामा बसेर २–४ जनाले तयार पारेको नीति तथा कार्यक्रम विशाल र समृद्व पोखराका लागि अपूरो हुने उनको भनाइ छ ।