पोखरा । कोरोनाका कारण स्थगित तेस्रो लोककवि अलि मियाँ स्मृति खुला सेभेन ए साइड फुटबल प्रतियोगिताको मिति तय भएको छ । नेपाल मुस्लिम युवा समितिले सो प्रतियोगिता आगामी फागुन २१ देखि २८ सम्म गर्ने निधो गरेको हो ।
स्वास्थ्य मापदण्डको पालना गरी पोखरा १३, माछापोखरी खेल मैदानमा सो प्रतियोगिता गर्न लागिएको प्रतियोगिता संयोजक अब्बु बकर मियाँले बताए । उनले युवालाई खेलकुदमा आकर्षित गर्न तथा खेलाडी उत्पादन गर्ने उद्देश्यले उक्त प्रतियोगिता गर्न लागेको जानकारी दिए ।
विजेतालाई नगद एक लाख २५ हजार नगद सहित ट्रफि, मेडल, प्रमाण पत्र र उपविजेतालाई नगद ७५ हजार सहित ट्रफि, मेडल, प्रमाण पत्र प्रदान गरिने छ । त्यस्तै सेमीफाइनल पुग्न सफल अन्य २ टिमलाई १०–१० हजार प्रदान गरिने छ ।
उत्कृष्ट खेलाडी, डिफेन्डर, मिड फिल्डर, हाई स्कोरर र गोलकिपरलाई जनही ५ हजार पुरस्कार प्रदान गरिने छ । प्रतियोगितामा करिब ५० टिमले सहभागिता जनाउने अपेक्षा आयोजकको छ । प्रतियोगिता सम्पन्न गर्नका लागि ८ लाख ७५ हजार खर्च लाग्ने अनुमान गरिएको छ ।