पोखरा । पोखराकै ड्रिम प्रोजेक्ट हो, केवलकार । ‘अन्नपूर्ण केवलकार’ अन्ततः शुक्रबारदेखि सञ्चालनमा आउँदैछ ।
कोरोना महामारीकै बीचमा निर्माण सम्पन्न भएको बहुप्रतिक्षित अन्नपूर्ण केवलकार पोखरामा नयाँ पर्यटकीय गन्तव्य पनि हो । पोखरा–१८ सेदी बगरमा निर्मित अन्नपूर्ण केवलकारको सफ्ट ओपनिङ हुन लागेको कम्पनीले जनाएको छ ।

फेवाताल किनारबाट सराङकोट जोड्ने गरी करिब २ अर्ब लागतमा निर्मित केबलकार सञ्चालनमा आउन लागेको अन्नपूर्ण केबलकार प्रालिका सञ्चालक एवं निर्देशक तीर्थराज त्रिपाठीले बताए । उनका अनुसार कोरोना महामारीले निर्धारित मितिमै सम्पन्न हुन नसकेपछि बल्ल आएर ओपनिङ गर्न लागिएको हो ।
मेकानिकल इन्जिनियर चिफ डिएन कायस्थले प्राविधिक पक्षबारे जानकारी दिंदै जापानको ‘निप्पन केबुल’ कम्पनीबाट डिजाइन र विकसित प्रविधि आफूहरुले यहाँ प्रयोगमा ल्याएको बताए ।
२ हजार ४ सय मिटर दूरी केवलकारबाट ८ देखि ९ मिनेटमै पुग्न सकिने छ । कम्पनीका अनुसार केवलकारको एउटा गोण्डोलामा ८ जनाको सिट क्षमता छ । १७ गोण्डोला यात्रुका लागि र १ गोण्डोला सामान ओसारपसार गर्न पयोग गरिनेछ ।
केवलकारबाट फेवातालसँगै सराङकोटबाट सूर्योदय, मनोरम हिमश्रृंखला, मनोरम पोखराको दृश्य अवलोकन गर्न सकिनेछ । केवलकारको माथिल्लो स्टेसनमा भ्यु टावर, गार्डेन, पार्किङ, रेष्टुरेन्ट, कफी सप हुने छन् ।

फेवाताल किनारदेखि सराङकोटसम्म करिब २ किमीको दूरी केवलकारबाट करिब ८ मिनेटमै पुग्न सकिने छ

पोखरा र काठमाडौंका प्रतिष्ठित व्यवसायीको लगानी रहेको केवलकार बनाउन सुरुआतमा १ अर्ब ३० करोड अनुमान गरिएकोमा संरचना थप र संक्रमणकालीन समयका कारण लागत बढेको कम्पनीको भनाइ छ । कम्पनीमा स्थानीयवासीबाट २५ प्रतिशतको लगानी छ ।
कम्पनीले नेपालीका लागि ७ सय, सार्क राष्ट्रका पर्यटकका लागि ८ सय र तेस्रो मुलुकका नागरिकका लागि ९ डलर शुल्क तोकेको छ । ज्येष्ठ नागरिक, अपांगता भएका व्यक्तिलाई ५० प्रतिशत छुट सुविधा छ ।
केवलकार निर्माणले यहाँ नयाँ पर्यटकीय गन्तव्य थप्ने र आन्तरिक एवं बाह्य पर्यटनलाई धेरथोर प्रवद्र्धन गर्ने विश्वास पोखरेलीको छ । नेपालमा सञ्चालित मनकामना र चन्द्रागिरी केवलकार जस्तै भए पनि यो केवलकारमा नयाँ प्रविधि प्रयोग गरिएको दाबी प्रालिको छ । नेपालमै सबैभन्दा पहिले मनकामना केवलकार सन् १९९८ देखि संचालनमा आएको हो । कुरिनटार–मनकामना जोड्ने केवलकारको लम्बाइ २ हजार ७ सय ७२ मिटर छ । यस्तै, २०१६ देखि संचालित चन्द्रागिरी केवलकारको लम्बाई २ हजार ४ सय मिटर छ । यसले थानकोट–चन्द्रागिरी जोड्छ । यसैगरी, गण्डकी प्रदेशमै तनहुँको पर्यटकीय एवं ऐतिहासिक क्षेत्र बन्दीपुर पुग्न पनि बन्दीपुर केवलकार निर्माण भइरहेको छ ।