पोखरा । गण्डकी प्रदेश सरकारका कानुन, सञ्चार तथा प्रदेश सभा मामिला मन्त्री विन्दुकुमार थापाले वन संरक्षणमा वन प्राविधिकहरुको भूमिका महत्वपूर्ण रहेको बताएका छन् । प्रजातान्त्रिक वन प्राविधक संघ नेपाल गण्डकी प्रदेशको प्रथम अधिवेशन कार्यक्रमलाई उद्घाटन गर्दै उनले नेपालमा अनावश्यक रुपमा वन फडानी भइरहेको र यसको संरक्षणमा लाग्नुपर्ने आवश्यकता औंल्याए ।
‘अनावश्यक रुपमा वन फडानी हुँदा प्राकृतिक विपत्तिजस्ता समस्या आइरहेका छन्’, उनले भने, ‘हरियो वन नेपालको धन केवल नारामा मात्रै सीमित रहेको छ, यसको संरक्षणमा सबै जुट्नुपर्ने आवश्यकता छ ।’ मन्त्री थापाले प्रदेश सरकारले वन संरक्षणसम्बन्धी ऐन निर्माण गर्ने तयारी गरिरहेको र संघीय सरकारको केही झन्झटिलो नीति नियमका कारण रोकिएको बताए । उनले वनलाई विकास निर्माण र देशको समृद्धिसँग पनि जोड्नुपर्नेमा जोड दिए ।
मन्त्री थापाले वनले पर्यटन क्षेत्रको विकासमा समेत टेवा पुग्ने विश्वास व्यक्त गरे । सामुदायिक वनको संरक्षणले नेपालमा पाइने दुर्लभ वन्यजन्तुमा ह्रास नआउने र अवलोकनका लागि पर्यटकहरुको आगमन बढ्ने उनको विश्वास थियो । उनले वन प्राविधिकहरुको समस्या न्यूनीकरणमा प्रदेश सरकार प्रतिबद्ध रहेको उल्लेख गरे । ‘वन प्राविधिकहरुलाई परेका समस्याको न्यूनीकरणमा प्रदेश सरकार प्रतिबद्ध छ ।’
मन्त्री थापाले विकास विरोधी वन ऐनका कारण कतिपय काठहरु वनमा नै कुहिएर नाश हुने अवस्था रहेको बताए । उनले वनसम्बन्धी ऐनलाई नै संशोधन गरी विकास अनुरुप बनाउनुपर्ने बताए । ‘विकास विरोधी ऐनका कारण वर्षौंदेखि वनमा आफैं ढलेका रुखहरुलाई काठका रुपमा परिणत गरी विकास आयोजनामा प्रयोग गर्न सक्ने अवस्था छैन’, उनले भने, ‘भारतबाट काठ आयात गर्नुपर्ने अवस्था छ । यस्ता ऐन कानुन संशोधन हुनुपर्छ ।’ वनलाई संरक्षण गर्दै पुराना रुखहरुलाई काठको रुपमा परिणत गरी विकास निर्माणमा प्रयोग गर्नुपर्ने उनको भनाइ थियो ।