पोखरा । नेपाली कांग्रेस पोखरा ६ स्थित ३ नम्बर टोल समितिको सभापतिमा विकास लामिछाने सर्वसम्मत चयन भएका छन् । नवनिर्वाचित सभापति लामिछाने टोलभित्रका सबै कांग्रेसीहरुलाई गोलबन्द गर्दै अघि बढ्ने प्रतिबद्धता जनाए । उनले विगतका तुलनामा कांग्रेसको जनलहर बढ्दै गएको स्पष्ट पारे ।
टोलको उपसभापति गीतादेवी पहारी र विपीन पौडेल, सचिव शारदा लम्साल, कोषाध्यक्ष सन्देश दहाल र सहसचिव आलोक पहारी चयन भए । सदस्यहरु उमा लामिछाने, निर्मला बोगटी, भुपाल भित्राकोटी, विमल थापा, हेमराज पराजुली र दिवश लामिछाने छन् ।
बैदाम क्षेत्रमा रहेका स्कुलपाटन, समिको पाटन, किमबारी र बाराही चोकलाई गोलबद्ध गरी टोललाई ३ नम्बर नामाकरण गरिएको सचिव प्रकाश न्यौपाने जानकारी गराए । शनिबार नै इकाइ ६ बैदामले टोलमा रहेका ज्येष्ठ नागरिक सदस्यलाई दोसल्ला ओढाइ सम्मान गरिएको छ ।
कार्यक्रममा नेपाली कांगे्रस गण्डकी प्रदेश कार्यसमितिका सभापति शुक्रराज शर्माले पार्टीको सबैभन्दा महत्वपूर्ण मेरुदण्ड टोल समिति भएको बताए । आगामी वैशाख ३० गते हुने स्थानीय चुनावको तयारीको लागि हरेक वडामा सबैले टोल समिति गठन गर्नेुपर्ने उनको भनाइ थियो ।
कास्की कांगे्रसका स.सचिव तथा वडा प्रतिनिधि शंकर ढुंगानाले नेपाली कांग्रेसको हालको नीति नै पार्टी मजबुद बनाउने रहेकाले संगठनलाई सक्रिय बनाउने योजना रहेको बताए । उनले टोल समितिमार्फत नै पार्टीलाई बलियो बनाउँदै कांग्रेसलाई देशको अगुवा पार्टी बनाउन आवश्यक रहेको बताए ।
नेपाली कांग्रेस पोखरा ६ का सभापति सन्तोष पौडेलले आसन्न निर्वाचनलाई दृष्टिगत गर्दै कांग्रेसका सबै तह सक्रिय हुनुपर्ने बताए । उनले चुनावमा कांग्रेसका उम्मेदवारहरुलाई आफ्नो एजेन्डासहित मतदाताहरुको घरमा गई बुझाउन सकेमात्र जीत सुश्चित हुने सुझाव दिए ।
टोल सभापति प्रभा पौडेल सुवेदीको सभा अध्यक्षतामा भएको कार्यक्रममा प्रदेश प्रतिनिधि देवेन्द्र केसी, नगर सचिव गणेशबहादुर थापा, पूर्व महिला संघ सभापति अन्नपूर्ण कुँवर, बैदाम ६ का नेविसंघं सभापति विष्णु पहारी, क्षेत्रीय प्रतिनिधि बलराम गिरी र सल्लाहकार तेजनारायण पराजुली लगायतले बोलेका थिए ।