पोखरा । पोखरामा प्रथम गण्डकी प्रदेश पारा खेलकुद प्रतियोगिता सुरु भएको छ । २ दिनसम्म पोखरामा रंगशालामा संचालन हुने प्रतियोगितामा १ सय ३२ खेलाडी सहभागिता जनाएका छन् ।
प्रतियोगिताअन्तर्गत पारा खेलकुदका ७ खेल हुने प्रदेश खेलकुद परिषद् गण्डकी सदस्य तथा प्रतियोगिता संयोजक अमृत बरालले जनाए । उनका अनुसार प्रतियोगितामा बोसिया, बहिरा व्याडमिन्टन महिला तथा पुरुष, बौद्धिक अपांगताका लागि दौड प्रतियोगिता, अप्टिजम अपांगताका लागि दौड, मनोसामाजिक अपांगताका लागि म्युजिकल चियर र शारीरिक अपांगता भएका व्यक्तिहरुका लागि ह्विल चियर बास्केटबल हुनेछन् ।
प्रतियोगिता उद्घाटन गर्दै परिषद् सदस्य सचिव तेजबहादुर गुरुङले प्रदेशमा पहिलो पटक आयोजना भएको पारा खेलकुदलाई व्यवस्थित बनाउन परिषद्ले वार्षिक रुपमा नै कार्यक्रम तय गर्ने बताए ।
पहिलो दिन पुरुषतर्फ दृष्टिविहीन टि–२० क्रिकेटमा गण्डकी रेड १६ रनले विजयी भयो । कास्की ब्लुविरुद्ध टस जितेर व्याटिङ रोजेको गण्डकी रेडले २० ओभरमा ६ विकेट गुमाउँदै १ सय ७३ रन बनायो । गण्डकी रेडका (वि–टु) सूर्य भट्टराईले नट आउट रहँदै ३७ रन बनाए भने (वि–वान) प्रमोद दाहालले ३७ र (वि–वान) का राम गुरुङले २० रनको योगदान दिएको अफिसियल रिजन प्रजुले जानकारी दिए ।
यस्तै, कास्की ब्लुका (वि–टु) प्रेमले १ विकेट हात पारे पनि अन्य ५ खेलाडी भने रन आउट भएका थिए । १ सय ७४ रनको विशाल स्कोर पछ्याउनेक्रममा कास्की ब्लुले ६.२ ओभरमा ५८ रन जोडेकोमा वर्षाले खेल स्थगित हुँदा डिएल मेथडमा भने गण्डकी रेड विजयी भयो । कास्की ब्लुका (वि–टु) दुर्गा पौडेलले १२ र (वि–वान) दुर्गा पौडेलले १२ रनमात्रै जोड्न सके । गण्डकी रेडका सूर्य भट्टराईले २ र प्रमोद दाहालले १ विकेट हात पारे ।