नवलपरासी । हत्याको अभियोगमा पक्राउ परेका ६ जनालाई प्रहरीले सार्वजनिक गरेको छ । गत माघ ८ मा विजय चौधरी रामग्राम नगरपालिका ९, पिपरहिया र जोकवारी सडक खण्डमा हत्या गरी फालिएको अवस्थामा भेटिएका थिए ।
कपिलवस्तुको शुद्धोधन १, उच्डिहवा घर भई हाल काठमाडौं २७, असनमा भाडा वर्तन एवं हार्डवयर व्यवसाय गर्ने ३५ वर्षीय चौधरीको हत्या भएको थियो । उनको हत्यामा रामग्राम ५, ड्राइभर टोल बस्ने ३७ वर्षीय राजु साह भनिने मञ्जुर आलम देवान र उनकी श्रीमती ३५ वर्षीया हदिसुन नेसासहित ६ जनालाई प्रहरीले पक्राउ गरेको हो ।
अनुसन्धानमा संलग्न प्रहरी अधिकारीका अनुसार चौधरीको साथको २० लाख रुपैयाँ लुटपाट गर्ने उद्देश्यले हत्या गरिएको खुलेको छ । हत्यालगत्तै मुख्य योजनाकार मञ्जुर आलम देवान र उनकी श्रीमती हदिसुन नेसा भारत फरार भएका थिए । उनीहरुलाई पश्चिम नवलपरासी प्रहरीले भारतीय प्रहरीको समन्वयमा पश्चिम नवलपरासीको पाल्हीनन्दन १, महेषपुर नेपाल भारत सीमा नजिकैबाट २५ माघ मंगलबार पक्राउ गरेको थियो । पक्राउ परेका ६ जनालाई नै प्रहरीले बिहीबार सार्वजनिक गरेको छ ।

माघ पहिलो साता मृत फेला परेका विजय चौधरीको हत्यामा संलग्न अभियोगमा ६ जना पक्राउ

पक्राउ पर्नेमा आलम दम्पतीसहित उनकी दिदी रामग्राम २, निवासी ४२ वर्षीया शारदादेवी केवट, भिनाजु वसन्तकुमार सहानी, काठमाडौं २९, निवासी ५० वर्षीय तलत अलि खान र रौतहटका ४१ वर्षीय जीतबहादुर श्रेष्ठलाई पक्राउ गरेको हो । प्रहरीका अनुसार शव घटनास्थलमा दुवै हात पछाडिबाट प्लाष्टिकको डोरीले कसेर बाँधिएको, अनुहार गम्छाले बेरिएको र गलबन्धीले घाँटीमा गाँठो बनाइ कसिएको अवस्थामा फेला परेको थियो ।
‘जग्गा’ कारोबार गर्ने भन्दै माघ ६ मा भैरहवा पुगेका चौधरी माघ ७ देखि हराइरहेका थिए । चौधरीको साथमा २० लाख नगद रहेको र उक्त रकम चौधरीले आफ्ना साथीहरुलाई समेत देखाएका थिए । उनकै साथी रहेका राजु साह भन्ने आलमले आफ्नै घरमा बोलाएर श्रीमतीको सहयोगमा उनको हत्या गरेको प्रहरीले जनाएको छ । हत्या लगत्तै आफन्त दिदी भिनाजुलाई रकम राख्न दिई आलम दम्पती भारत पुगेका थिए ।
नवलपरासी प्रहरीले सीमाक्षेत्रमा लुकीछिपी बसेको अवस्थामा पक्राउ गरेको भने पनि प्रहरी टोली भारत नै पुगेर पक्राउ गरी नेपाल ल्याइएको हो । पक्राउ परेका आलमले हत्यामा आफू र श्रीमतीको हात रहेको बयान दिएको प्रहरी नायव उपरीक्षक प्रेमबहादुर शाहीले बताए । आलमले प्रहरीसँगको प्रारम्भिक बयानमा आफूले हात बाँधेर खुट्टा समाएको र श्रीमतीले घाँटी कसेर चौधरीको हत्या गरेको बयान दिएका छन् । आलम दम्पती ऋणमा डुबेको, ऋण तिर्न नसकेको कारण चौधरीसँग रहेको २० लाख रुपैयाँ लिन हत्या गरेको खुल्न आएको शाहीले बताए । नवलपरासी प्रहरीबाट डिएसपीको टोली भारत पुगेको थियो । त्यसैगरी प्रहरी हेडक्वार्टरले समेत काठमाडौंबाट एक डिएसपीलाई भारत पठाएको थियो । २ डिएसपीसहितको प्रहरी टोलीले बुधबार बिहान ५ बजे दुवै जनालाई पक्राउ गरी नेपाल ल्याएको थियो ।