पोखरा । निर्वाचन आयोगले आगामी वैशाख ३० गते हुने स्थानीय तहको निर्वाचनका लागि आन्तरिक कार्यतालिका तयार पारेको छ । जसअनुसार २०७९ वैशाख ११ मा उम्मेदवारी मनोनयन हुने तयारी छ ।
वैशाख ११ गते बिहान १० बजेदेखि अपरान्ह ४ बजेसम्म उम्मेदवारको मनोनयन दर्ता गर्ने समयसहितको कार्यतालिका तयार पारेर आयोगले परामर्श थालेको हो । स्रोतका अनुसार वैशाख १२ गते १० देखि ५ बजेसम्म उम्मेदवारको विरोधमा उजुरी दिने, वैशाख १३ देखि १४ गते अपरान्ह ५ बजे सम्ममा मनोनयन पत्र र उजुरी उपर जाँचबुझ गरी निर्णय गर्ने समय निर्धारण गरिएको छ ।
यसैगरी, वैशाख १४ मा अपरान्ह ५ देखि ६ बजे सम्म मनोनयन भएका उम्मेदवारको नामावली प्रकाशन, वैशाख १५ गते १० देखि ४ बजेसम्म उम्मेदवारको नाम फिर्ता, वैशाख १६ मा १० देखि मध्यान्ह १२ बजेसम्म उम्मेदवारको अन्तिम नामावली प्रकाशन र सोही दिन उम्मेदवारलाई निर्वाचन चिह्न प्रदान गर्ने तालिका छ ।
निर्वाचन प्रयोजनका लागि राजनीतिक दल दर्ताका लागि २०७८ फागुन १ देखि १० सम्मका लागि समय निर्धारण गरिएको छ । त्यही अवधिसम्म राजनीतिक दलतर्फबाट औपचारिक पत्र प्रदान गर्ने पदाधिकारीको दस्तखत नमुना प्राप्ति गर्ने समय पनि निर्धारण गरिएको छ ।
आयोगले तोकेको मितिदेखि जेठ ६ सम्म निर्वाचन आचारसंहिता कार्यान्वयन गरिने समय निर्धारण गरिएको छ । २०७९ वैशाख २ गते निर्वाचन अधिकृतको नियुक्ति गरिने, वैशाख ३ मा कालोसूचीमा रहेका व्यक्तिहरूको विवरण निर्वाचन अधिकृतलाई हस्तान्तरण गर्ने तालिका छ । वैशाख ३ गते नै राजनीतिक दलको आधिकारिक दस्तखत नमुनासहितको पत्र सबै निर्वाचन अधिकृतलाई हस्तान्तरण गर्ने समय निर्धारण गरिएको छ ।
वैशाख २७ देखि ३ दिनसम्म मौन अवधि तथा २८ देखि २९ सम्म मतदान केन्द्रमा मतदाता परिचयपत्र वितरण गर्ने तालिका बनाइएको र सोबारे छलफल चलिरहेको आयोगका प्रवक्ता शालिग्राम शर्मा पौडेलले बताए । उनका अनुसार अब केही दिनमै आयोगले उक्त निर्वाचन कार्यतालिका स्वीकृत गरेर सार्वजनिक गर्ने छ ।