पोखरा । कल्याण शेरचनको ११ औं स्मृति दिवस एवं कल्याण शेरचन स्मृति प्रतिष्ठानको १० औं वार्षिक साधारणसभा भएको छ । प्रतिष्ठान संरक्षक नरबहादुर शेरचनको प्रमुख आतिथ्यमा सोमबार स्व. शेरचनको स्मृति दिवस एवं वार्षिक साधारणसभा सम्पन्न भएको हो ।
सभामा प्रतिष्ठानका सचिव जीवन दाहालले वार्षिक प्रगति प्रतिवेदन र कोषाध्यक्ष प्रदिप गौचनले आर्थिक प्रतिवेदन प्रस्तुत गरेका थिए ।
कार्यक्रममा नरबहादुर शेरचन र प्रतिष्ठानका सल्लाहकार एवम तमु धिं नेपालका अध्यक्ष हुमबहादुर गुरुङले शुभकामना मन्तव्य तथा उपाध्यक्ष श्रीजंग गुरुङ स्वागत मन्तव्य राखेका थिए ।
प्रतिष्ठान अध्यक्ष क्या.पूर्णबहादुर ह्योल्मोले लोक स्रष्टा, साधक, शिल्पी कल्याण शेरचनको स्मृति दिवसमा विगतमा राष्ट्रिय मादल, सारंगी, एकल नृत्य, खेलकुद, साहित्यिक लगायत कार्यक्रम गरी स्वर्गीय स्रष्टाको स्मरण गर्ने गरेकोका आगामी दिनमा उनकै विधा राष्ट्रिय लोकदोहोरी प्रतियोगिता गर्ने जानकारी दिए । यसरी नै स्रष्टाको सम्मानका लागि सालिक निर्माण गर्ने योजना पनि रहेको अध्यक्ष ह्योल्मोले बताए । प्रतिष्ठान अध्यक्ष क्या.ह्योल्मोको अध्यक्षता र सचिव जीवन दाहालले संचालन गरेको कार्यक्रममा सहभागीले लोक स्रष्टा, साधक, शिल्पी कल्याण शेरचनको योगदानको स्मरण गरेका थिए ।