पोखरा, १० माघ । डिफेण्डिङ च्याम्पियन संकटा क्लबलाई ४–१ को फराकिलो गोलअन्तरले पराजित गर्दै लिगलिडर मच्छिन्द्र फुटबल क्लब २० औं आहारारा गोल्डकप फुटबल प्रतियोगिताको सेमिफाइनल प्रवेश गरेको छ।

सोमबार पोखरा रंगशालामा तेस्रो क्वाटरफाइनलमा पहिलो हाफ १–० को अग्रता लिएको मछिन्द्रले दोस्रो हाफमा गोलको वर्षा गर्दै सहजरुपमा अन्तिम चारमा आफूलाई सुरक्षित पारेको हो । जीतका लागि म्यान अफ दि म्याच मेसुकी एटिग्नी ओलुमौको २, उत्सव राई र अभिशेक गुरुङले १–१ गोलको योगदान दिए । मच्छिन्द्रका लागि गणेश हमालले सान्त्वना गोल गरेका थिए । जीतसँगै मच्छिन्द्र अब नेपाल एपिएफ क्लबसँग पहिलो सेमिफाइनल खेल्नेछ।

मंगलबार चौथो तथा अन्तिम क्वाटरफाइनलमा त्रिभुवन आर्मी क्लब र रुस्लान थ्रि स्टार क्लबीच प्रतिस्पर्धा हुने आयोजक सहारा क्लब पोखराले जनाएको छ । विजेताले दोस्रो सेमिफाइनलमा मनाङ मस्र्याङ्दी क्लबसँग भेट सुनिश्चित गर्नेछ।