पोखरा । संगम बचत तथा ऋण सहकारी संस्था लिमिटेड शिक्षा, तालिम तथा सूचना उपसमितिले आयोजना गरेको उद्घोषण कला तथा नेतृत्व विकास तालिम सञ्चालन गरेको छ । तालिम समापन समारोहमा नेपाल पत्रकार महासंघका केन्द्रीय सदस्य सरीता तिम्सिना पंगेनीले सहकारीले महिलाको आर्थिक सशक्तीकरणमा महत्वपूर्ण भूमिका खेलेको बताइन् । उनले नेतृत्व विकास तालिमले महिलालाई नेतृत्व तहमा पु¥याउन सहयोगी भूमिका खेल्ने विश्वास व्यक्त गरिन् ।
सहकारीले सामाजिक उत्तरदायित्व अन्तर्गत सामुदायिक स्कुलको खाजा अभियानमा सहयोग, राष्ट्रिय आविष्कार केन्द्रको पिपिई उत्पादन कार्यमा सहयोग, वृद्धाश्रममा सहयोगलगायत विभिन्न कार्यहरु गर्दै आइरहेको सहकारीका कार्यवाहक अध्यक्ष नवराज तिवारीले बताए । उनले सहकारीले सदस्यहरुलाई स्वरोजगारतर्फ उन्मुख गराउने उद्देश्यका साथ सेनिटरी प्याड बनाउने, चुरापोते बनाउने, फेब्रिकको माला बनाउनेलगायत सीपमूलक तालिम पनि दिँदै आएको उल्लेख गरे ।
सहकारीका शिक्षा ,तालिम तथा सूचना उपसमितिका संयोजक तिलक थापाले महिला लक्षित कार्यक्रमअन्तर्गत तालिम आयोजना गरिएको बताए ।
कार्यक्रममा ऋण उपसमिति संयोजक भरतबहादुर थापा, सञ्चालक समिति सदस्य विष्णुकुमारी थापा, कार्यक्रम संयोजक तुलबहादुर गुरुङ, उपसमिति सदस्य सरस्वती अधिकारीलगायतले शुभकामना मन्तव्य व्यक्त गरे ।
कार्यक्रममा प्रशिक्षार्थीहरुको तर्फबाट शर्मिला कुँवर, लक्ष्मी गुरुङ, दुर्गादेवी कुवँर र विनु देवकोटाले अनुभव सुनाएका थिए ।
सहकारीका महिला सेयर सदस्यका लागि ५ दिनसम्म चलेको तालिमलाई शिक्षा तालिम तथा सूचना उपसमितिका संयोजक मानवअधिकारकर्मी तिलक थापाले सहजीकरण गरेका थिए ।
सुगम सहकारीसँगको मर्जपछि पालिखे चोक, महेन्द्रपुलबाट समेत सेवा दिँदै आएको सहकारीको प्रधान कार्यालय पोखरा १५ रामबजार रहेको छ । कुल ६१ करोडको वासलात रहेको सहकारीको कर्जा लगानी ४५ करोड छ भने सहकारीले गत आर्थिक वर्षमा जग्गासमेत खरिद गरेको छ ।