पोखरा । कर्म फ्लाइट्स फाउन्डेसन पोखराले कोभिड १९ राहतस्वरुप शनिबार पथप्रदर्शक तथा पदयात्रा सहयोगीलाई रोजगारीस्वरुप पदयात्रा मर्मत तथा सरसफाइ कार्यक्रम गरेको छ । हेमजाको मेलबोटबाट माछापुच्छ्रे गाउँपालिका वडा नम्बर ६ को पर्यटकीय गाउँ अस्ताम आसपास पदयात्रा बाटो मर्मत तथा अस्ताम को खानेपानी पँधेरो मूलको सरसफाइ गरेको संस्थाका कार्यक्रम संयोजक राजु परियारले बताए ।
कर्म फ्लाइट्स एडभेन्चर एन्ड ट्रेक्स मा आश्रित आधारभूत तहका २३ जना पथ पदर्शकहरुलाई एक दिनको कामको ज्याला र खाजाबापत् प्रतिव्यक्ति १६१५ का दरले ३७ हजार १ सय ६८ प्रदान गरिएको छ ।
आफ्नै गाउँघर पनि सरसफाइ गरेर नगद प्राप्त गर्दा आफूलाई खुसी अनि आत्मसम्मान प्राप्त भएको हर्क परियारले बताए । कर्म फ्लाइट्ससँग एकताका पदयात्रा गर्न आएका अमेरिकी पर्यटकको एक परिवारले गाइडहरुको राहतको लागि उक्त रकम पठाइदिएको थियो ।
सन् २०२० को सुरुदेखि नै संस्थाले सामाजिक उत्तरदायित्व बहन गर्दै आएको संस्थाका कार्यक्रम संयोजक प्रेमबहादुर कुँवरले बताए ।
संस्थाका कार्यसमिति सदस्य कुलप्रसाद अधिकारीको अध्यक्षतामा भएको औपचारिक कार्यक्रममा माछापुच्छ्रे ६ का अध्यक्ष्य हरिश्चन्द्र ढुंगानाले संस्थाको प्रशंसा गरे । संस्थाका कोषाध्यक्ष रेनुका कार्कीले सञ्चालन गरेकी थिइन् ।