पोखरा । वैदेशिक रोजगारीका कमीकमजोरी न्युनीकरणका लागि राज्यलाई नीतिगत पैरवी गर्दै आएको गैरसरकारी संस्था एशिया मानव अधिकार तथा सांस्कृतिक विकास मञ्च (एसियन फोरम) को अन्तक्र्रिया बिहीबार सम्पन्न भयो ।
एसियन फोरम गण्डकी प्रदेश तथा कास्की जिल्ला समितिको संयुक्त आयोजनामा भएको कार्यक्रममा संस्थापक अध्यक्ष सिद्धिचन्द्र बरालले कोरोनाका कारण प्राय गैरसरकारी संस्था बन्द भएको अवस्थामा एसियन फोरमले कोरोनाले बढी असर पारेको क्षेत्रमा कार्य गरेको बताए ।
संस्थाका पूर्व अध्यक्ष नीरज थापाले संस्थाले काठमाडौ उपत्यका, तनहुँ र कास्की जिल्लामा शिक्षा र स्वास्थ्यको क्षेत्रमा उल्लेखनीय कार्य गर्दै आएको बताए ।
सो अवसरमा केन्द्रीय सचिव विजय गुरुङ, सदस्य मीरा पौडेल, गण्डकी प्रदेश अध्यक्ष लक्ष्मण बानियाँ, सचिव कृष्ण रानाभाट, कोषाध्यक्ष उमाकान्त पराजुली, सदस्य रामचन्द्र लामिछाने, कास्की जिल्ला अध्यक्ष तिलक थापा, कोषाध्यक्ष पार्वती पौडेल रेग्मी, सदस्य किरण गुरुङले धारणा व्यक्त गरेका थिए ।
सो अवसरमा प्रदेश समिति र जिल्ला समितिको साधारण सभा तथा अधिवेशन छिट्टै गर्ने निर्णय गर्न प्रदेश सचिव कृष्ण रानाभाटको संयोजकत्वमा तयारी समिति गठन गरिएको छ । समिति सदस्यमा रामचन्द्र लामिछाने र कास्की जिल्ला कोषाध्यक्ष पार्वती पौडेल रेग्मी रहेको कास्की जिल्ला अध्यक्ष तिलक थापाले बताए ।