पोखरा । मादी गाउँपालिकास्तरीय तेस्रो राष्ट्रपति रनिङ सिल्ड प्रतियोगिताअन्तर्गत छात्रछात्रा भलिबलमा सेमिफाइनल समीकरण पूरा भएको छ ।
बिहीबार छात्रातर्फ महारुद्र मावि तप्राङ र दूधपोखरी मावि सोंधा तथा राष्ट्रज्योति मावि र जनकल्याण मावि सेमिफाइनल प्रवेश गरेका छन् ।
छात्रतर्फ ध्रुव मावि र जनकल्याण मावि तथा सीताराम मावि र दूधपोखरी मावि अन्तिम ४ मा प्रवेश गरेका हुन् । शुक्रबार दुवै इभेन्टको सेमिफाइनल र फाइनल हुने प्रतियोगिता संयोजक झलक पोख्रेलले जानकारी दिए ।
रनिङ सिल्डअन्तर्गत बिहीबार ठेलो प्रतियोगितामा छात्रतर्फ ध्रुव मावि तारकाङका मिलन विक र छात्रातर्फ राष्ट्रज्योति माविकी सिर्जना तामाङ प्रथम भए । मिलनले १५.०९ मिटरसम्म र सिर्जनाले १२.३६ मिटरसम्म छेठो फालेका थिए ।
सो प्रतियोगितामा छात्रतर्फ जनकल्याण मावि मकैखोलाका राजन राना द्वितीय र हिमालय मावि गोर्जेका छात्र मनोज मगर तृतीय भए । छात्रातर्फ जनकल्याण माविकी इशा गुरुङ द्वितीय र सीताराम माविकी छात्रा सुस्मिता परियार तृतीय भइन् । विजयीलाई शुक्रबार नै पुरस्कार वितरण गरिने आयोजकले जनाएको छ । मादी गाउँपालिका ४, बेतेनीमा गाउँपालिकाले निर्माण गरेको खेलग्राम बुधबार उद्घाटनसँगै रनिङ सिल्ड सुरु भएको हो ।