पोखरा, ११ मंसिर । नेपाली कांग्रेसको १४ औं महाधिवेशनअन्तर्गत कास्कीमा नेतृत्वका लागि शनिबार पुनः मतदान भएको छ । प्रतिस्पर्धामा रहेका ५ उम्मेदवारबीच यसअघि शुक्रबार भएको मतदानमा कुनै पनि उम्मेदवारले बहुमत ल्याउन नसकेपछि बढी मत ल्याउने किशोरदत्त बराल र सुदीपमोहन भट्टराईबीच पुनः मतदान भएको हो ।

दोस्रो दिनको मतदानमा १ हजार ९ सय २६ मत खसेको निर्वाचन समितिले जनाएको छ । कुल २ हजार ८८ मतदातामध्ये बिहान १० देखि दिउँसो ४ बजेसम्म भएको मतदानमा १ हजार ९ सय २६ मत खसेको हो । पहिलो दिन २ हजार २५ जनाले मतदानमा भाग लिएकोमा ४७ मत बदर भएको थियो ।

शुक्रबार मध्यरातमा सकिएको मतगणनामा सबैभन्दा बढी मत ल्याउने बरालले ६ सय ४४ र दोस्रो हुने भट्टराईले ४ सय ६९ मत पाएका थिए । त्यस्तै, तेस्रो स्थानको मत ल्याउने आईबहादुर गुरुङको दोस्रो मत ल्याउने भट्टराईको तुलनामा मात्र ७ मत कम थियो । त्यस्तै चौथो र पाँचौ स्थानमा रहेका पोषनाथ शर्माले ३ सय ३५ र गिरिराज गौतमले मात्र ६३ मत पाएका थिए।

शनिबार भएको मतदानको गणना साँझ ७ बजेदेखि सुरु हुने तयारी छ । शनिबार सभापतिसहित सबै पदाधिकारीको पनि गणना हुनेछ । अघिल्लो दिन सभापतिको मात्र गणना भएको थियो।

यसैबीच, सभापतिको दौडबाट बाहिरिएका ३ उम्मेदवारले आफूहरुको समर्थन सुदीपमोहन भट्टराईलाई रहेको घोषणा गरेका छन् । उनीहरुले मतदान सुरु हुनुपूर्व भट्टराईलाई समर्थन गर्न सार्वजनिक अपिलसमेत जारी गरेका थिए।
कांग्रेसको संशोधित विधान अनुरुप सभापतिमा निर्वाचित हुन ५० प्रतिशत मत कटाउनै पर्ने बाध्यता छ।