पोखरा । गण्डकी सरकारले चालु वर्षका लागि ३० अर्ब ३ करोडको बजेट सार्वजनिक गरेको छ । यसअघिकै योजना सम्पन्न गर्न २९ अर्बभन्दा बढी लाग्ने छ । ३० अर्बको बजेट नयाँ योजनामै सकियो । प्रदेश सरकारसँग बजेट धेरै छैन । संघकै अनुदानमा भर पर्नुपर्ने बाध्यतामा रहेको गण्डकीलाई यो वर्ष पनि संघले अपेक्षाकृत बजेट दिएन । अघिल्लो वर्ष वित्तीय समानीकरणतर्फ ७ अर्ब ११ करोड, समपूरकमा १ अर्ब ४९ करोड, विशेष अनुदानतर्फ ५४ करोड दिएको छ । राजस्व बाँडफाँटमा ७ अर्ब ५७ करोड दिने भनिएकोमा १ अर्ब ८ करोड रुपैयाँ घट्यो । यो वर्ष पनि पुरानै तथ्यांक दोहोरिने सम्भावना छ ।
तोकिएकै अनुदान नआउने अवस्थामा गण्डकीका मुख्यमन्त्री कृष्णचन्द्र नेपाली पोखरेल योजनाको फेहरिस्थ लिएर थप बजेट माग्न काठमाडौं पुगेका छन् । प्रधानमन्त्री शेरबहादुर देउवा र अर्थमन्त्री जनार्दन शर्मालाई भेटेर उनले केही योजनाहरुमा तत्कालै बजेट विनियोजन गरिदिन आग्रह गरे । प्रत्येक पालिकामास्तरीय सडक पुर्याउने गण्डकी सरकारको पहिलो लक्ष्य छ । यो कार्यक्रम सुरु भैसकेको छ । हाल ३ सय ३९ किलोमिटर सडक निर्माणाधीन अवस्थामा छन् भने थप २ सय ८७ किलोमिटर सडकको डिपिआर भइसकेको छ । दुवै सडकलाई १४ अर्ब ३५ करोड लाग्ने अनुमान छ । चालु वर्षमै ३ अर्ब छुट्याइदिन पोखरेलले प्रधानमन्त्रीसँग आग्रह गरे ।
यस्तै, ५० मोटरेबल पुलका लागि ३ अर्ब र यो वर्ष ७० करोड छुट्याउनै पर्ने माग प्रदेश सरकारको छ । उनले गण्डकीका योजना र अनुमानित लागतसहितको मागपत्र प्रधानमन्त्री र अर्थमन्त्रीलाई बुझाएका हुन् । गण्डकी प्रदेशसभाको भवन निर्माणका लागि ७५ करोड, ठेक्का लागिसकेका कार्यक्रम सम्पन्न गर्न ४ अर्ब मागेका छन् । ‘रकम कम आउँदा प्रदेशका योजना प्रभावित भएका छन् । संघबाटै हस्तान्तरण भएका योजना सम्पन्न गर्न ५ अर्ब चाहिन्छ । सशर्तका योजना सक्न थप ७० करोड आवश्यक छ,’ उनले भने, ‘प्रदेशसँग पैसा छैन । ती योजना कसरी पूरा गर्ने ?’ पोखरेलले २९ अर्ब ८० करोडको योजना संघ सरकारलाई बुझाएका हुन् । चालु वर्षका लागि कम्तीमा ११ अर्ब ४५ करोड विनियोजन गरिदिन उनको आग्रह छ ।
असोज २४ मा प्रम शेरबहादुर देउवाले गण्डकी प्रदेशलाई साक्षर प्रदेश घोषणा गर्ने तयारी छ
पोखरेलले दुम्कीवासदेखि त्रिवेणीसम्मको सडक सञ्जाल बिस्तारको लागि पनि संघ सरकारको ध्यानाकर्षण गराएका छन् । यो सडक बनाउन १६ अर्ब लाग्ने गरी डिपिआर तयार गरिएको छ । राष्ट्रिय निकुञ्जको ८ किलोमिटरमा सुरुङ मार्ग निर्माण गर्दा सहज हुने प्रदेश सरकारको प्रस्ताव छ । यसमा संघ सरकारले पूर्ण रुपमा सहयोग गर्ने वाचा गरेको छ । भेटका क्रममा प्रधानमन्त्री शेरबहादुर देउवाले प्रदेश विकासका लागि संघ सरकारले बजेट व्यवस्था गर्ने बताए । देउवाले फेवाताल संरक्षणबारे पनि चासो राखेका थिए । ‘फेवातालको अवस्था के छ भनेर सोध्नुभयो । प्रदेशको अवस्थाबारे सोधीखोजी गर्नुभयो,’ मुख्यमन्त्रीका प्रेस संयोजक भरत कोइरालाले भने, ‘मुक्तिनाथ केवलकारका विषयमा पनि चासो राख्नुभएको थियो । बजेट चाहिँ अर्थमन्त्रीसँग समन्वय गरेर व्यवस्था गर्ने प्रतिबद्धता जनाउनुभएको छ ।’
अर्थमन्त्री जनार्दन शर्माले प्रदेशलाई संस्थागत गर्न संघ सरकार संवेदनशील रहेको प्रतिक्रिया दिए । उनले बजेटको अवस्था हेरि प्रदेशलाई हस्तान्तरण गर्ने प्रतिबद्धता जनाएका छन् । ‘दशैं लगत्तै मुख्यमन्त्री र अर्थमन्त्रीबीच छलफल चलाउछौं । माग र आवश्यकता आधारमा बजेट व्यवस्था हुन्छ,’ उनले भने ।
यसैबीच, गण्डकी प्रदेशलाई साक्षर प्रदेश घोषणा गर्न लागिएको छ । असोज २४ गते पोखरामा औपचारिक कार्यक्रम गरी प्रधानमन्त्री शेरबहादुर देउवाले साक्षर प्रदेश घोषणा गर्ने तयारी छ । कार्यक्रमकै लागि मुख्यमन्त्री पोखरेलले प्रधानमन्त्री देउवालाई निमन्त्रण दिएर फर्किएका छन् । भदौ ३० मा बसेको प्रदेश मन्त्रिपरिषद् बैठकले साक्षर प्रदेश घोषणा गर्ने निर्णय गरेको थियो । सरकारी तथ्यांक अनुसार नवलपुरमा सबैभन्दा बढी ९८ प्रतिशत नागरिक साक्षर छन् । सबैभन्दा कम लमजुङमा ९५.५ प्रतिशतमात्रै नागरिक साक्षर भएको तथ्यांक छ ।
मुस्ताङ ९६.३५, स्याङ्जा ९६.१६, कास्की ९६, तनहुँ ९६.४, बागलुङ ९६.५७, मनाङ ९६.९, गोरखा ९७.२, म्याग्दी ९६.२७ र पर्वत ९६.९३ प्रतिशत नागरिक साक्षर भइसकेका शिक्षा, संस्कृति, विज्ञान प्रविधि तथा सामाजिक विकास मन्त्रालयले जनाएको छ । लक्षित समूहका ९५ प्रतिशतभन्दा बढी नागरिक साक्षर भए साक्षर भएको घोषणा गर्न मिल्छ । मुस्ताङ सबैभन्दा पहिलो साक्षर जिल्ला घोषणा भएको हो । २०७१ असार ३१ मा मुस्ताङ घोषणा भएको हो भने सबैभन्दा अन्तिममा पर्वत २०७४ माघ १८ मा घोषणा भएको थियो ।
Related News
सम्बन्धित समाचार
प्रदेश सरकार उलटपुलट
दृष्टिविहीनलाई बाटो देखाउँदै गुगल
रुपाको अस्पताल र स्वास्थ्य बिमा बोर्डबीच सम्झौता
युनाइटेडद्वारा शैक्षिक तथा खेल सामग्री वितरण
रुपाको अस्पताल र स्वास्थ्य बिमा बोर्डबीच सम्झौता
hero news full width
मुख्य समाचार
चोटिलो बन्दै गण्डकीको संसदीय राजनीति
पुरानो पोखरा जोगाउन पहल: मेयर आचार्य
वैशाख ६, २०८१सुदुरपश्चिममा सोडारी मुख्यमन्त्री नियुक्त
वैशाख ६, २०८१प्रेमील गजलकारको भावपूर्ण बिदाइ
वैशाख ५, २०८१अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
वैशाख ५, २०८१गण्डकी प्रदेश सभाको अधिवेशन आह्वान
वैशाख ५, २०८१