चरीकोट । चराचुरुङ्गी वन्यजन्तु तथा तिनको वासस्थान संरक्षणका लागि गौरीशङ्कर संरक्षण क्षेत्र आयोजनाले गुलेली सङ्कलन अभियान सञ्चालन गरेको छ ।

गौरीशङ्कर संरक्षण क्षेत्र आयोजनाले १४औँ राष्ट्रिय संरक्षण दिवस २०७८ को अवसर पारेर चराचुङ्गी तथा वन्यजन्तुको संरक्षण गराउने उद्देश्यले गुलेली सङ्कलन अभियान सञ्चालन गरेको हो ।

गौरीशङ्कर संरक्षण क्षेत्र आयोजना र प्रहरीले आज संयुक्त रुपमा दोलखाको उत्तरी क्षेत्र सिङ्गटी बजारमा गुलेली सङ्कलन अभियान सञ्चालन गरेको छ । अभियानअन्तर्गत सो क्षेत्रबाट ३४ गुलेली र गुलेली बनाउन प्रयोग हुने ३७७ थान रबर सङ्कलन गरेको छ ।

राष्ट्रिय प्राकृतिक संरक्षण कोष गौरीशङ्कर संरक्षण क्षेत्र आयोजनाले गाउँगाउँबाट गुलेली सङ्कलनको लागि आयोजनाअन्तर्गतका संरक्षण क्षेत्र व्यवस्थापन समितिलाई खटाएको र गाउँगाउँमासमेत गुलेली सङ्कलन भइरहेको संरक्षण क्षेत्रका सूचना अधिकारी तुलसीप्रसाद दाहालले बताउनुभयो ।

सो अभियानअन्तर्गत गुलेली बुझाएर सहयोग गर्नेहरुलाई उचित मूल्यसमेत दिइने आयोजनाले जनाएको छ । गौरीशङ्कर संरक्षण क्षेत्रभित्र रहेका विभिन्न प्रजातिका चराचुङ्गी तथा वन्यजन्तुलाई संरक्षण गराउने उद्देश्यले यो अभियान सञ्चालन गरिएको आयोजनाले जनाएको छ । गौरीशङ्कर हिमाललाई आधार बनाइ निर्माण गरिएको गैरीशङ्कर संरक्षण क्षेत्र दोलखा, रामेछाप र सिन्धुपाल्चोक गरी तीन जिल्लामा फैलिएको छ ।

यो संरक्षण क्षेत्रमा विभिन्न प्रजातिका चराचुङ्गी तथा वन्यजन्तुको बासस्थान रहेको पाइन्छ । चीनको सीमा तथा हिमाली क्षेत्रसँग जोडिएकाले यस संरक्षण क्षेत्रमा गतवर्ष संरक्षित वन्यजन्तु हिमचितुवा फेला परेको थियो । हिमचितुवा तथा अन्य संरक्षित वन्यजन्तु संरक्षण क्षेत्रमा रहेको हुँदा उनीहरुको संरक्षणको लागि आयोजनाले अभियान सञ्चालन गर्दै आएको छ ।

संरक्षित पक्षी सिकार गरी मारेमा वा घाइते बनाएमा रु १५ हजारदेखि ३० हजारसम्म जरिवाना वा तीन महिना देखि नौ महिनासम्म कैद वा दुवै सजाय हुने व्यवस्था छ । राष्ट्रिय निकुञ्ज, वन्यजन्तु आरक्ष, संरक्षण क्षेत्र वा मध्यवर्ती क्षेत्रभित्र अनुज्ञापत्र नलिइ संरक्षित पक्षीबाहेक अन्य पक्षी सिकार गरी मारेमा वा घाइते बनाएमा रु २० हजारदेखि रु ५० हजारसम्म जरिवाना वा छ महिनादेखि एक वर्षसम्म कैद वा दुवै सजाय व्यवस्था छ ।