पोखरा । पवित्र बचत तथा ऋण सहकारी संस्थाको ११ औं स्थापना दिवसको अवसरमा लामेआहालस्थित वृद्धाश्रमलाई खाद्यान्न सहयोग गरेको छ । सहकारीले पोखरा ३२ लामेआहालस्थित राधाकृष्ण वृद्धाश्रमलाई चामल, दाल, तेल, चना, बिस्कुट, नुन, चिनी, चियालगायत खाद्यान्न सहयोग गरेको हो ।
सहकारीका अध्यक्ष शिवबहादुर रानाभाटले सहकारीको सामाजिक उत्तरदायित्वअन्तर्गत आश्रमलाई सहयोग गरिएको बताए । संस्थाका सल्लाहकार चन्द्रबहादुर रानाभाटले आश्रमको सुरुआती अवस्थादेखि हालसम्मको प्रगति सबैको सामु देखिएको भन्दै आगामी दिनहरुमा पनि उत्तरोत्तर प्रगतिको कामना गरेका थिए ।
कार्यक्रममा सहकारीका उपाध्यक्ष बुद्धिबहादुर रानाभाट, संस्थापक सचिव एवं पत्रकार कृष्ण रानाभाट, कोषाध्यक्ष होमबहादुर रानाभाट, सदस्य तथा ऋण समिति संयोजक भीमबहादुर रानाभाट, कार्य समिति सदस्य कल्पना भण्डारी रानाभाटलगायतले बोलेका थिए ।
सहयोग ग्रहण गर्दै राधाकृष्ण वृद्धाश्रम सञ्चालक समितिका अध्यक्ष प्रेम लिगलले सहयोगदाताको सहयोगले वृद्धाश्रम सञ्चालन भएको बताउँदै आगामी दिनमा पनि सहयोगका लागि आग्रह गरे ।
सहकारीका अध्यक्ष शिवबहादुर रानाभाटको अध्यक्षतामा भएको कार्यक्रमको सञ्चालन सचिव गुप्तबहादुर रानाभाटले गरेका थिए ।