पोखरा । छोटो अवधिमै पोखरा घुम्न चाहनेलाई कम शुल्कमै बस सेवा सञ्चालन हुँदैछ । कोरोना संक्रमण घटेसँगै पर्यटकीय नगरी पोखरा घुम्न नयाँ प्याकेज ल्याइएको हो ।
पोखरा बसाइँ छोटो छ तर धेरै ठाउँ घुम्न चाहनेलाई होटलकै पर्यटक बोक्ने गाडी तथा महँगो शुल्क लिने भाडाको ट्याक्सीबाहेक अर्को कुनै उपाय छैन । तर पछिल्लो समय घोषित प्याकेजमा ८ घण्टामा पोखरा उपत्यकाको प्रमुख पर्यटकस्थलमा घुमाउने गरी बस सेवा सुरु हुँदैछ ।
पोखराबाट काठमाडौं तथा लुम्बिनीसम्म लामो दूरीमा बस सेवा दिइरहको स्विफ्ट होलिडेले पोखराको रमणीय ठाउँ घुमाउने गरी ६ सय रुपैयाँमा एकदिने प्याकेज ल्याएको हो । असोज १ देखि सुरु हुने उक्त सेवा हरेक दिन बिहान ८ बजे लेकसाइडको हल्लनचोकबाट सुरु भइ साँझ ५ बजे सकिने छ ।
स्विफ्ट होलिडेका मार्केटिङ म्यानेजर प्रदीप भट्टका अनुसार पर्यटकलाई हल्लनचोक हुँदै फिस्टेल गेटबाट लिएपछि विन्ध्यवासिनी मन्दिर भ्रमण गराएर सराङकोट पुर्‍याइनेछ । त्यसपछि वेगनासताल पुर्‍याएपछि त्यहाँ पर्यटकले अवलोकन गरेपश्चात दिवा खाना खाने छन् । बेगनासपछिको गन्तव्य शान्ति स्तुपा, शिव मन्दिर, पातले छाँगो, गुप्तेश्वर गुफा, रातो पहिरोस्थित बन्जी जम्प रहनेछ ।
अन्त्यमा, फेवाताल सिरान पामे लगेर १ घण्टाको विश्रामपछि हल्लनचोक र फिस्टेल गेटमा पर्यटकलाई छोडेर ८ घण्टाको घुमघाम सकिने उनले बताए । चौबिस सिट क्षमताको २ बसका ठूला झ्यालबाट पर्यटकले वाह्य दृश्यको मजा लिन सक्ने छन् । बस टिकट इसेवाबाट समेत काट्न सकिने छ ।