पोखरा । नेसनल फुटसल लिगमा प्रतिस्पर्धा गर्ने पोखरेली टोली स्पोर्टस् क्यासललाई हस्पिटल पार्टनरको रुपमा दीप हस्पिटल एन्ड रिसर्च सेन्टरले साथ दिने भएको छ । पोखरा रंगशालामा आगामी २ असोजदेखि २२ गतेसम्म सञ्चालन हुने लिग अवधिभर खेलाडीलाई आवश्यक स्वास्थ्यसम्बन्धी सबै सेवाहरु उपलब्ध गराइने अस्पतालका सञ्चालक अर्जुन गुरुङले बताए ।
उनले क्यासल टिमलाई व्यवस्थापनका लागि ५० हजारसमेत सहयोग गरेको बताए । ‘५० हजार त सानो रकममात्रै हो, उनले भने, ‘हामीले आगामी दिनमा समेत क्यासलसँग सकारात्मक र रचनात्मक कार्यक्रमहरुमा सहकार्य निरन्तर गर्नेछौं ।’
पोखरा महानगरपालिका १ स्थित शिक्षा कार्यालयको पारिपट्टिरहेको दीप अस्पतालमा २४ सैं घन्टा आकस्मिक सेवासमेत सञ्चालन हुँदै आएको छ । गुरुङका अनुसार आकस्मिक सेवासँगै भिडियो एक्सरे, एक्सरे, इसिजी, ओपिडी र ल्याबको व्यवस्था रहेको छ ।

इन्स्युरेन्स पार्टनरमा ‘सगरमाथा’

सगरमाथा इन्स्युरेन्स कम्पनी प्रालिले क्यासलका खेलाडीहरुलाई लिग अवधिभरका लागि जनही १ लाख बराबरको स्वास्थ्य बिमाको व्यवस्था गरेको न्युरोड शाखा प्रमुख राजेश केसीले बताए । उनकाअनुसार खेलका अवधिमा कुनै पनि क्यासलका खेलाडी घाइते भएमा उपचारका लागि सगरमाथा बिमा कम्पनीले व्यहोर्ने छ ।
यसअघि क्यासललाई पोखराकै प्रतिष्ठित व्यपारिक घराना अंशुभराले मुख्य प्रायोजनको रुपमा १ वर्षको लागि सम्झौता गरिसकेको छ ।
गण्डकी प्रदेशबाट स्पोर्टस् क्यासलसँगै सविन मेमोरियल फुटसल टिमले उक्त लिगमा सहभागिता जनाउँदै छ । देशभरबाट कुल १० टिमको सहभागिता रहने सो प्रतियोगिताको विजेता टोलीले नगद १० लाख र उपविजेताले ५ लाख प्राप्त गर्ने अखिल नेपाल फुटबल संघ (एन्फाले) जनाएको छ ।