पोखरा । पोखरा–१३ स्थित रतनपाण्डे माध्यमिक विद्यालयमा स्वर्गीय गुरुप्रसाद÷गोमादेवी बराल स्मृति अक्षयकोष घोषणा तथा हस्तान्तरण गरिएको छ । विद्यालयमा अध्ययनरत गरिब तथा जेहेनदार विद्यार्थिलाई शिक्षण सिकाइमा सघाउने उद्देश्यका ६ लाखको अक्षयकोष स्थापना गरिएको हो ।
पोखरा १३ आर्बा स्थायी घर भई हाल काठमाडौं रहेका मधुप्रसाद बराल र विन्ध्येश्वरी बराल संरक्षक रहने गरी स्व. गुरुप्रसाद/गोमादेवी बराल स्मृतिमा अक्षयकोषको रकम हस्तान्तरण गरिएको विद्यालयका प्रधानाध्यापक डिल्लीराम बरालले जानकारी दिए ।
रकम हस्तान्तरण कार्यक्रममा पोखरा १३ का अध्यक्ष लेखबहादुर तामाङ (दर्शन लामा) ले सबैको साथ, सहयोग र योगदानले मात्र विद्यालयको समग्र शैक्षिक तथा भौतिक विकास सम्भवन हुने बताए । उनले सम्पूर्ण आर्वालीहरुको लामो योगदानबाट विद्यालय अहिलेको स्थितिसम्म आइपुगेको बताउँदै विद्यालयको स्तरोन्नतिका वडा कार्यालयबाट पहल गर्ने उल्लेख गरे ।
अक्षयकोषका संरक्षक मधुप्रसाद बरालले धेरै विद्यालयहरुका बीचमा पनि रतनपाण्डे माध्यमिक विद्यालयमा अक्षयकोष स्थापना गरी सार्वजनिक शिक्षाको सबलीकरणमा टेवा पुर्याउन पाएकोमा खुसी व्यक्त गरे । अक्षयकोषदाता विन्ध्वेश्वरी बराल, दान उत्प्रेरणाका लागि सहजीकरण गर्ने कृष्णप्रसाद बराल, समाजसेवीहरु पोषराज बराल, किरण बराल, सुविता आचार्य, प्रतुश बराल, हरिश्चन्द्र सिग्देल, सुभाष सिग्देल, केदारनाथ सिग्देल, शरदकान्त सिग्देल, शोभाकान्त सिग्देल, बृहस्पति सापकोटा, विष्णुमाया सापकोटालगायतले विद्यालयले गरेको पछिल्लो शैक्षिक सुधारबाट प्रभावित भएर अक्षयकोष स्थापना गरिएको बताए ।
विद्यालय व्यवस्थापन समितिका अध्यक्ष वसन्तराज बरालको अध्यक्षतामा भएको कार्यक्रममा सदस्य विनोद बरालले स्वागत र प्रअ डिल्लीराम बरालले सञ्चालन गरेका थिए ।