पोखरा । महिलालाई ललाईफकाई यौनधन्दामा संलग्न गराएको अभियोगमा पोखराबाट एक युवक पक्राउ परेका छन् । पक्राउ पर्नेमा नुवाकोट तारेकश्वर गाउँपालिका ४ घर भइ हाल पोखरा ६, खहरेचोक बस्ने २७ वर्षीय विशाल भन्ने विष्णु श्रेष्ठ हुन् ।

खहरेचोकमा होटल लिटिल ह्यावेन सञ्चालन गर्दै आएका उनले महिलालाई डरत्रास तथा प्रलोभनमा पारी जबर्जस्ती यौन शोषण कार्यक्रममा लगाउने गरेको सूचना आधारमा कास्की प्रहरीलाई उनलाई मंगलबार बिहान पक्राउ गर्न सफल भएको हो । निजविरुद्ध मानव बेचबिखन तथा ओसारपसार मुद्दामा जिल्ला अदालतबाट ३ दिनको म्याद थपी अनुसन्धान अगाडि बढाइएको प्रहरी प्रवक्ता डिएसपी सुवास हमालले जानकारी दिए ।
पीडित महिलालाई मनोपरामर्श गरी आफन्तको जिम्मा लगाइएको छ ।

यसैबीच, जुवातास खेल्नेमाथि कास्की प्रहरीले पछिल्लो समय निगरानी बढाएको छ । प्रहरीले सोमबार पोखरा १५ का लालप्रसाद गुरुङको डेराकोठामा जुवा खेलिरहेका ७ जनालाई ८४ हजार सहित पक्राउ गरेको छ । पक्राउ पर्नेमा स्याङ्जा पुतलीबजार घर भै पोखरा बस्ने ५१ वर्षीय लालप्रसाद गुरुङ, ४७ वर्षीय विकास गुरुङ, ३६ वर्षीय मनोज गुरुङ, आँधीखोलाका ३७ वर्षीय सुशील रानाभाट, २८ वर्षीय कल्याण पौडेल, वालिङका २४ वर्षीय मनोज गुरुङ र तनहुँ शुक्लागण्डकीका ३७ वर्षीय प्रकाश गुरुङ हुन् ।