पोखरा । गुरुङ चलचित्र तमुस्यो मेगा म्याक्स टेलिभिजनको च्यानल नम्बर ७७७ मा प्रसारण हुने भएको छ । पाइला फिल्मस् प्रालि र मेगा म्याक्स टेलिभिजनबीच भएको सम्झौताअनुसार भदौ ११ गतेदेखि चलचित्र म्याक्स टिभीमा प्रसारण हुने भएको हो । पे–पर–भ्युको आधारमा दर्शकले फिल्म हेर्न पाउने भएका छन् ।
कोरोना महामारीले हलहरु बन्द भएको अवस्थामा टिभीमा गुरुङ चलचित्र प्रदर्शन गरेर सबै दर्शकमाझ पुर्‍याउने काम म्याक्स टिभीले गरेको मेगा म्याक्स टेलिभिजन सञ्चालक मनोज गुरुङले बताए । गत १ साउनमा भोजबहादुर गुरुङ निर्देशित फिल्म मैरिमो म्याक्स च्यानलमा प्रदर्शन भएको थियो । मैरिमो प्रसारण भएपछि आफूहरुमा थप हौसला बढेको बताउँदै अब झोलामा टिकट बोकेर हिँड्ने दिनको अन्त्य हुने धारणा राखे ।
माओत्से तुङ गुरुङले निर्देशन गरेको गुरुङ चलचित्र प्रदीप गुरुङले निर्माण गरेका हुन् । बलबहादुर गुरुङ, सुमित गुरुङ, निकिल गुरुङ, उर्मिला गुरुङ, रोशनी गुरुङ, प्रेमा गुरुङ, रेजिना गुरुङलगायत कलाकार रहेको तमुस्यो पवर्तको चित्रे र कास्कीको केही गाउँहरुमो छायांकन गरिएको छ । एउटा गुरुङ्सेनी (तमुस्यो) ले आफ्नो भेषभूषा, भाषा, संस्कृति, रहनसहन र पहिचानमा रोधींबाट कसरी सुरु गर्छिन् भन्ने देखाउन खोजिएको निर्देशक गुरुङले बताए । चलचित्रमा रोधीं एउटा सिर्जनशील घर हो भन्ने पनि देखाउन खोजिएको गुरुङ बताउँछन् ।