पोखरा । नेपाली युवा उद्यमी मञ्च (एनवाइइएफ) पोखराले स्टार्ट अप हबका लागि गण्डकी प्रदेश सरकारसँग सहकार्य गर्ने प्रस्ताव गरेको छ । मञ्च अध्यक्ष सुनिलबहादुर भट्टराईले सरकारका कानुन, सञ्चार तथा प्रदेशसभा मामिला मन्त्री बिन्दुकुमार थापालाई भेटेर स्टार्ट अप हबका लागि सहकार्य गर्ने प्रस्ताव गरेका हुन् ।
सरकारले पोखरा १८, सहिदपार्क नजिकै निर्माण गर्न लागेको ‘सूचना तथा प्रविधि पार्क’ (आइटी पार्क) भित्र स्टार्ट अप हब निर्माणका लागि सहकार्य गर्न आफूहरु तयार रहेको भन्दै मन्त्री थापालाई ज्ञापनपत्र बुझाएको भट्टराईले जानकारी दिए ।
नयाँ योजना लिएर कोही उद्योग सञ्चालन गर्न आएमा उसलाई काउन्सिलिङ दिनेदेखि योजना कार्यान्वयन गर्नेसम्म सघाउने, सफल उद्योगीसँग अन्तक्रिया गराएर थप प्रेरित गर्ने, लगानी नभएकालाई लगानीकर्ता भेटाइदिने लगायत काम स्टार्ट अप हबमा गरिने अध्यक्ष भट्टराईले बताए ।
सो अवसरमा मन्त्री थापाले प्रस्ताव सकारात्मक रहेकाले सरकार सहकार्यका लागि तयार रहेको आश्वासन दिए ।