पोखरा । नेपाली कांग्रेस सभापति शेरबहादुर देउवा पाँचौ पटक प्रधानमन्त्री बनेका छन् । दुई तिहाइ नजिकको सरकार अल्पमतमा परेपछि एमाले अध्यक्ष केपी शर्मा ओलीको दुखद बहिर्गमन भएको थियो । ओलीको बिदाइसँगै देउवा विपक्षी गठबन्धनको नेतृत्व गर्दै मंगलबार प्रधानमन्त्री नियुक्त भएका हुन् ।
सर्वोच्च अदालतले सोमबार संविधानको धारा ७६ (५) बमोजिम देउवालाई प्रधानमन्त्री बनाउन परमादेश जारी गरेको थियो । उनको यसअघिका चारवटै कार्यकाल विवादित बन्यो । देउवा २०५२ भदौमा पहिलो पटक प्रधानमन्त्री भएका थिए । उनी प्रधानमन्त्री भएको आधा वर्ष पनि नपुग्दै माओवादी जनयुद्ध सुरु भएको थियो । माओवादीले सरकारसँग राखेको ४० बुँदे मागपत्रको बेवास्ता गरेपछि जनयुद्ध सुरुवात भएको हो । संयोगले आज उनै देउवा माओवादी समेतको गठबन्धनबाट प्रधानमन्त्री नियुक्त भए ।
दोस्रो पटक २०५८ साउनमा प्रधानमन्त्री बनेका देउवाले २०५९ जेठमा बहुमत सदस्यको सहमति बेगर प्रतिनिधिसभा विघटनको सिफारिस राजासमक्ष गरेका थिए । त्यही घटनाले नेपाली कांग्रेस विभाजन भयो । कांग्रेसको साधारण सदस्य समेत नरहने गरी कारबाहीमा परेका देउवाले खोलेको कांग्रेस प्रजातान्त्रिकको सभापतिका रुपमा उनी २०६१ सालमा तेस्रो पटक प्रधानमन्त्री बने । चुनाव गराउन नसकेको आरोप लगाएर राजा ज्ञानेन्द्रले उनलाई पदमुक्त गरि दिए । उनै देउवा २०७४ जेठ २३ मा चौथो पटक प्रधानमन्त्री बने । उनको नेतृत्वमा संघीय व्यवस्थाको चुनावसमेत भयो । यद्यपि कांग्रेस भने नराम्रोसँग पराजित हुन पुग्यो ।
यसपटक कोभिड संक्रमण भयावह छ । नागरिकको जिउधनको रक्षा प्राथमिक कार्ययोजना हुनुपर्छ । पाँचौ पटक सत्तारोहण गरेका देउवाले ३० दिनभित्र विश्वासको मत लिनुपर्ने छ । बहुमत पुर्याउन सके बाँकी अवधि उनी नै प्रधानमन्त्री बन्ने छन् भने विश्वास नपाए संसद पुनः विघटन हुनेछ र ६ महिनाभित्र मध्यावधि निर्वाचनको मिति घोषणा हुनेछ । त्यो चुनावी सरकारको नेतृत्व पनि देउवाले नै गर्ने छन् ।
ओली २०७४ फागुन ३ मा करिब दुई तिहाइ बहुमतको समर्थनमा प्रधानमन्त्री बनेका थिए । बैशाख २७ गते आफ्नो पक्षमा विश्वासको मत नपाएपछि राष्ट्रपति विद्यादेवी भण्डारीले उपधारा (३) बमोजिम ठूलो दलको नेताको हैसियतमा प्रधानमन्त्री नियुक्त गरेकी थिइन् । ३० दिनभित्र विश्वासको मत लिनुपर्नेमा उनले आफुसँग बहुमत नभएको भन्दै बीचबाटै उपधारा (५) बमोजिम सरकार गठनका लागि आह्वान गर्न राष्ट्रपतिलाई पत्र पठाए । सोही पत्रका आधारमा भण्डारीले नयाँ सरकार गठनको आह्वान गरिन् । त्यतिबेला पनि ओलीले १ सय ५२ सांसदको हस्ताक्षर बुझाएर प्रधानमन्त्रीमा दाबी गरे भने देउवाले १ सय ४९ सांसदको हस्ताक्षर बुझाएका थिए ।
सांसदहरु विभाजित भएको भन्दै भण्डारीले कसैको बहुमत नपुगेको देखाएर नयाँ प्रधानमन्त्री बनाइनन् । ओलीकै सिफारिसमा संसद भंग गर्दै मंसिर १७ र २७ मा निर्वाचन घोषणा गरिन् । तर सर्वोच्चले देउवासँग बहुमत रहेको भन्दै उनैलाई प्रधानमन्त्री नियुक्त गर्न परमादेश जारी गरेपछि राजनीतिले नयाँ मोड लिएको हो ।
५ सदस्यीय मन्त्रिमण्डल
राष्ट्रपति विद्यादेवी भण्डारीले नवनियुक्त प्रधानमन्त्री देउवालाई पद तथा गोपनीयताको सपथ गराएकी छन् । राष्ट्रपति कार्यालय, शीतल निवासमा आयोजित समारोहमा देउवाले पद तथा गोपनीयताको सपथ लिएका हुन् ।
राष्ट्रपति भण्डारीले प्रधानमन्त्री नियुक्तिमा संविधानको धारा उल्लेख नगरेको भनी देउवाले नियुक्ति सच्याएर मात्र सपथ लिने अडान लिएका थिए । सोही कारण सपथ ग्रहणमा ढिलाइ भएको थियो । पछि राष्ट्रपतिले सर्वाेच्च अदालतको फैसलाका साथै संविधानको धारा ७६ (५) अनुसार प्रधानमन्त्री नियुक्त भएको उल्लेख गरेपछि देउवाले सपथ लिएका हुन् ।
देउवाले मंगलबार नै सानो आकारको मन्त्रिपरिषद् बिस्तार गरेका छन् । देउवा मन्त्रिपरिषद्मा बालकृष्ण खाँड गृहमन्त्री बनेका छन् । यस्तै, नेकपा माओवादी केन्द्रका नेता जनार्दन शर्मा अर्थमन्त्री तथा माओवादी नेतृ पम्फा भुसाल ऊर्जा मन्त्री बनेकी छन् । देउवा नेतृत्वको अघिल्लो सरकारमा अर्थमन्त्री ज्ञानेन्द्रबहादुर कार्कीले अहिले कानुन, न्याय तथा संसदीय मामिला मन्त्रालयको जिम्मा दिइयो । नवनियुक्त मन्त्रीहरु पनि मंगलबार नै सपथ लिए ।
माओवादीले सरकारसँग राखेको ४० बुँदे मागपत्रको बेवास्ता गरेपछि २०५२ मा जनयुद्ध सुरुवात भएकोमा संयोगले आज उनै देउवा माओवादीसमेतको गठबन्धनबाट प्रधानमन्त्री नियुक्त भए ।
सपथ समारोहमा संवैधानिक निकायका प्रमुख एवं पदाधिकारी, पूर्वप्रधानमन्त्री, राजनीतिक दलका नेता, नेपाल सरकारका उच्चपदस्थ कर्मचारी र सञ्चारकर्मीको उपस्थिति थियो । प्रधानमन्त्रीको सपथपछि देउवालाई नेकपा एमालेका वरिष्ठ नेता माधवकुमार नेपालले बधाई दिएका छन् । सपथ समारोह सकिएपछि प्रधानमन्त्री देउवालाई बधाई दिने क्रममा सबैभन्दा पहिले नेता नेपालले हात मिलाएर बधाई दिए । त्यसपछि क्रमश नेकपा माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका नेता रामचन्द्र पौडेल, पूर्वप्रधानमन्त्री डा. बाबुराम भट्टराई, जनता समाजवादी पार्टी अध्यक्ष उपेन्द्र यादवलगायतका नेता तथा सांसदहरुले बधाई दिएका थिए । समारोहमा प्रधानमन्त्री केपी शर्मा ओली भने सहभागी भएनन् ।
प्रजातान्त्रिक आन्दोलनमा देउवाको सक्रियता
कांग्रेसका संस्थापक नेता बिपी कोइरालाका प्रेरणाबाट राजनीतिमा होमिएका देउवाको जन्म २००३ साल जेठ ३१ गते डडेल्धुराको आसिग्राम–५ रुवाखोलामा भएको थियो । उनी हाल बूढानीलकण्ठ नगरपालिका भद्रकालीमा बसोबास गर्दै आएका छन् । विसं २०१७ को राजनीतिक घटनाक्रमपछि नेपालको प्रजातान्त्रिक आन्दोलनमा निरन्तर सक्रिय उनी विद्यार्थी आन्दोलनबाट राजनीतिमा होमिएका हुन् । प्राथमिक शिक्षा गृह जिल्ला, माध्यमिक शिक्षा डोटी र उच्च शिक्षा काठमाडौंमा हासिल गरेका उनले त्रिविबाट राजनीतिशास्त्रमा स्नातकोत्तर र कानुनमा स्नातक गरेका छन् । नेपाल विद्यार्थी संघका प्रथम निर्वाचित सभापति एवं संस्थापक सदस्य देउवा राजनीतिशास्त्रमा लन्डन स्कुल अफ इकोनमिक्सका रिसर्च फेलो रहिसकेका छन् ।
विसं २०४८, २०५१, २०५६ र २०७४ का संसदीय निर्वाचनमा डडेल्धुराबाट निर्वाचित उनी २०६४ र २०७० सालमा भएको संविधानसभाको निर्वाचनमा डडेल्धुराका साथै कञ्चनपुर र कैलालीबाट समेत विजयी भएका थिए । विसं २०४८ मा गृहमन्त्री बनेका देउवाले त्यसपछि पटक पटक गरी ४ पटकसम्म प्रधानमन्त्रीको जिम्मेवारी सम्हालिसकेका थिए ।
प्रधानमन्त्री हुँदा उनले पिछडिएको भूभाग, सीमान्तकृत वर्ग, महिला, दलित, जनजाति र मधेसलाई राष्ट्रिय विकास प्रक्रियाको मूलधारमा ल्याउन कर्णाली–दलित–महिला–जनजाति–मधेस (कदमजम) को अवधारणा ल्याएका थिए । त्यस्तै उनकै पालामा विशेष वर्ग एवं समुदायको उत्थानका लागि राष्ट्रिय महिला आयोग, आदिवासी जनजाति आयोग, दलित आयोगजस्ता विभिन्न आयोग गठन भएका हुन् ।
पार्टीभित्रको कलह बढ्दै गएपछि २०५९ सालमा कांग्रेस विभाजन भई गठित नेपाली कांग्रेस (प्रजातान्त्रिक)का उनी सभापति बने । पछि विसं २०६४ मा कांग्रेस र कांग्रेस (प्रजातान्त्रिक)को एकतापछि उनी कांग्रेसको वरिष्ठ नेता बने । त्यसपछि विसं २०७२ फागुन २४ मा सम्पन्न कांग्रेसको १३ औं महाधिवेशनमा उनी तत्कालीन कार्यवाहक सभापति रामचन्द्र पौडेललाई पराजित गर्दै सभापतिमा निर्वाचित भए । सभापति एवं संसदीय दलका नेता देउवा व्यवस्थापिका–संसद्को बैठकबाट २०७४ साल जेठ २३ गते चौथो प्रधानमन्त्री निर्वाचित भएका थिए ।
सन् २००८ देखि २०१२ सम्म सोसलिष्ट इन्टरनेसनलका उपाध्यक्ष उनी सन् २०१३ देखि उक्त संगठनको अन्तर्राष्ट्रिय उपाध्यक्ष छन् । प्रजातान्त्रिक आन्दोलनक्रममा उनले पटकपटक गरी १० वर्ष कारागार जीवन बिताएका छन् । उनले २ दर्जन बढी देशको भ्रमण गरेका छन् ।
Related News
सम्बन्धित समाचार
चुमानलाई पहिलोपटक ढुकुटीको साँचो, मनाङे फेरि भौतिकमा
चुमानलाई अर्थ, मनाङेलाई भौतिक पूर्वाधार मन्त्रालयको जिम्मा
हेमराज पहारी स्मृति पुरस्कारबाट सरुभक्त पुरस्कृत
गण्डकी प्रदेश सभाको बैठक अनिश्चितकालका लागि स्थगित
चोटिलो बन्दै गण्डकीको संसदीय राजनीति
hero news full width
मुख्य समाचार
पुरानो पोखरा जोगाउन पहल: मेयर आचार्य
सुदुरपश्चिममा सोडारी मुख्यमन्त्री नियुक्त
वैशाख ६, २०८१प्रेमील गजलकारको भावपूर्ण बिदाइ
वैशाख ५, २०८१अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
वैशाख ५, २०८१गण्डकी प्रदेश सभाको अधिवेशन आह्वान
वैशाख ५, २०८१गण्डकीमा अधिवेशन डाक्न सिफारिस, मुख्यमन्त्रीले विश्वासको मत लिँदै
वैशाख ५, २०८१