हेमजा । पोखरा २५, हेमजाको वडा कार्यालयले वडाभित्रका महिला स्वास्थ्य स्वयं सेविकालाई छाता र पछ्यौरा (सल) प्रदान गरेको छ । कार्यालयले वडाका कूल ३५ स्वयंसेविकालाई आइतबार कार्यक्रमबीच ती सामग्री प्रदान गरेको हो । त्यस अवसरमा बहुद्देश्यीय सामुदायिक सिकाई केन्द्रले स्वयंसेविकालाई झोला पनि वितरण गरेको थियो ।
उक्त कार्यक्रममा धारणा राख्दै वडाध्यक्ष शोभाकर तिम्सिनाले स्वयंसेविकाको कार्य प्रशंसनीय रहँदै आएको चर्चा गर्दै मानिसमा हरेक मृत्युदर घटाउन स्वयं सेविकाको उल्लेख्य योगदान रहँदै आएको बताए । पछिल्लो पटक कोरोना भाइरस नियन्त्रणमा पनि स्वयं सेविकाको कार्य सराहनीय रहेको उनको ठहर छ ।
वडा सदस्य लक्ष्मी अधिकारीले स्वयंसेविकाको प्रोत्साहन गर्नुपर्ने भन्दै वडाले कार्यक्रम राखेको औंल्याइन् । कार्यक्रममा कार्यक्रमकी संयोजक वडा सदस्य तारा विश्वकर्मा, वडा सचिव ईश्वरीप्रसाद पोखरेल, वडा स्तरीय स्वयं सेविकाकी अध्यक्ष शान्ता केसी, बहुद्देश्यीय सामुदायिक सिकाइ केन्द्रकी परिचालिका गंगा त्रिपाठी, स्वयंसेविका विष्णुकुमारी श्रेष्ठलगायतले पनि धारणा राखेका थिए ।
त्यस्तै सोही दिन हेमजा स्वास्थ्य चौकीमा कार्यरत ७ कर्मचारीलाई पनि छाता प्रदान गरिएको छ ।