बागलुङ । दूधको भुक्तानी रोकिएपछि बागलुङको बलेवा र कुश्मीशेरा क्षेत्रका किसान मर्कामा परेका छन् । बागलुङ नगरपालिकाको अमलाचौर, नारायणस्थान र जैमिनी नगरपालिकाको कुश्मीशेराका किसानले उत्पादन गर्ने दूधको भुक्तानी रोकिएको हो । कुश्मीशेराको टुनीबोट, खौर, किसेक, बागलुङ नगरपालिका १२ अमलाचौरको टाकुरी, सरङ्गी गाउँका किसानले लामो समयदेखि दूध बिक्रीबापतको भुक्तानी नपाएका हुन् ।
कुश्मीशेराको टार र बागलुङ नगरपालिका १४ को नारायणस्थानका किसानको पनि समस्या उस्तै छ । मुख्य आयस्रोत दूधको भुक्तानी नै रोकिएपछि किसानहरू मर्कामा छन् । दूध उत्पादनकै लागि पालिएका गाईभैंसीलाई खुवाउने दाना चोकर र घर खर्च चलाउनसमेत कठिन भएको किसान प्रेम पौडेल बताउँछन् । यहाँ उत्पादन भएको दूध बागलुङ र पर्वतका विभिन्न दूध डेरीहरूले खरीद गर्छन् । बागलुङको दक्षिणमा रहेका ४ वटा दुग्ध उत्पादक सहकारीको साझा बिक्री केन्द्र गठन गरेर सहकारीहरूले दूध बिक्री गर्छन् ।
कालीगण्डकी, पल्लोपाखा, नवनमूना र बलेवा नारायणस्थान दुग्ध उत्पादक सहकारी संस्थाको सहभागिता रहेको संयुक्त बिक्री केन्द्र छ । बिक्री केन्द्रमार्फत दूध खरीद गरेका कतिपय डेरी पसलहरूले अघिल्लो वर्षको असारदेखिको पैसा भुक्तान गरेका छैनन् । ‘हाम्रो दूध लिने बागलुङको न्यु लक्ष्मी डेरीले अघिल्लो असारपछिको पैसा दिएकै छैन, पटकपटक ताकेता गर्दासमेत पैसा नआएपछि हामी प्रक्रियामा जाँदै छौं,’ संयुक्त बिक्री केन्द्रका अध्यक्ष लीलाधर पौडेलले भने, ‘डेरीहरूले रकम रोकिदिंदा सहकारीले किसानलाई उपलब्ध गराउन सकेनन् ।’
पौडेलका अनुसार कुश्माको शीतल डेरी, मोदीकाली डेरी, न्यु कालीगण्डकी डेरी र बागलुङको अभिषेक डेरीलगायतका संस्थाले किसानको रकम भुक्तानी नदिएका हुन् । ‘झण्डै २५ लाख उठ्न बाँकी छ, केहीको १ वर्ष पुग्यो, केहीले ४÷५ महिनादेखि रोकेका छन्,’ पौडेल भन्छन्, ‘यता सहकारीहरूले आफ्नै स्रोतबाट पनि किसानको रकम भुक्तानी गर्न सक्ने अवस्था छैन ।’ बिक्री भएको दूधकै पैसा नआएका कारण किसानलाई समयमा भुक्तानी दिन कठिन भएको कालीगण्डकी दुग्ध उत्पादक सहकारी संस्थाका सचिव रुद्रनाथ शर्माले बताए ।
यहाँका डेरी पसलहरूले भुक्तानी समयमा नदिएपछि अहिले ४ वटै सहकारीबाट उत्पादित दूध पोखराको लभकुश डेरीमा पठाउन थालिएको छ । ४ वटा सहकारीले दैनिक १ हजार लिटर दूध उत्पादन गर्छन् । ‘पोखराको डेरीबाट हाम्रै दूध ल्याएर बेचेका छन् तर हाम्रो पुरानो पैसा दिँदैनन्’, पौडेल भन्छन्, ‘वैशाख यता पोखरा गएको दूधको भुक्तानी भने रोकिएको छैन ।’
सहकारीहरूको संयुक्त बैठकले एकपटक आग्रह गर्ने र भुक्तानी नपाए कानुनी प्रक्रियामा जाने निर्णय गरेको अध्यक्ष पौडेलले सुनाए । दूध प्रशस्त हुने याममा दूध ‘होलिडे’ गर्न लगाउने र बेमौसममा खरीद गर्ने गरेका डेरी पसलहरूले किसानको दूधको भुक्तानीमा भने आलटाल गर्दै आएका छन् । समयमा भुक्तानी नपाउँदा किसान भने पेसाप्रति नै निराश हुने गरेका छन् ।
Related News
सम्बन्धित समाचार
फेदीखोलाको सर्केटारीमा प्रथम आलु प्रदर्शनी
रैथाने बाली संरक्षण गर्दै कृषि ज्ञान केन्द्र
विदेश पलायन रोक्न वालिङ नगरपालिकाले दियो दूधमा अनुदान
जलवायु परिवर्तनले कृषिमा असर
कृषि क्षेत्रमा पोखरा महानगरको फड्को, किसानलाई समर्थन मूल्यवापत २७ लाख हस्तान्तरण
hero news full width
मुख्य समाचार
असुरक्षित टहरामा बस्न वाध्य सुरक्षाकर्मी
गण्डकी सरकारले २०८१ मा ३ दिन बिदा दिने
चैत्र १५, २०८०किरिया बसेका दाजुभाइ परीक्षामा
चैत्र १५, २०८०सुरु भयो एसइई, ५ लाख ४ हजार ४ सय १४ विद्यार्थी सामेल
चैत्र १५, २०८०बजेट अभावमा नगर अस्पतालको काम रोकियो
चैत्र १५, २०८०एमाले कास्कीमा को-को निर्वाचित ? (अन्तिम मतपरिणामसहित)
चैत्र १४, २०८०