दमौली । कोरोनाविरुद्धको खोप खरिद गर्न तनहुँका स्थानीय तहले स्वास्थ्य मन्त्रालयसँग अनुमति मागेका छन् ।

कोरोना भाइरसबाट आक्रान्त नागरिकलाई बचाउन मन्त्रालयमा पत्राचार गर्दै खोप किन्ने अनुमति मागेको म्याग्दे गाउँपालिका अध्यक्ष मायादेवी रानाले बताइन् । गाउँपालिकामा कोभिड संक्रमितको संख्या बढ्दै गएको र रोकथामको लागि खोप नै भरपर्दो भएको हुनाले आफ्नै स्रोतबाट खोप किन्ने निर्णय गरिए बमोजिम अनुमति माग गरिएको उनले बताइन् ।

व्यास नगरपालिकाले खोप उपलब्ध गराउन नसके किन्ने वातावरण मिलाउ केन्द्र सरकारसँग माग गरेको छ । नागरिकको जीवन रक्षाका लागि विकास बजेट कटौती गरेर खोप किन्न चाहेको व्यास नगरपालिकाका प्रमुख वैकुण्ठ न्यौपानेले बताए । उनले भने, ‘केन्द्र सरकारको मुख ताकियो भने समयमा खोप लगाउन सकिँदैन’, उनले अघि भने, ‘त्यसैले आफैँ खोप किनेर जनतालाई लगाउन नगरपालिकाले यो कदम चालेको छ ।’

स्थानीयले कोरोनाविरुद्धको भ्याक्सिन माग गरेकाले यथाशीघ्र उपलब्ध गराइदिन मन्त्रालयसँग अनुरोध गरिएको न्यौपानेले बताए । उनले भने, ‘खोप उपलब्ध गराउन नसके खोप किन्ने अनुमति दिए पुग्छ । हाम्रा नगरवासीलाई खोप लगाई कोरोनाबाट सुरक्षित गराउन चाहन्छौं ।’

केन्द्र सरकारले आवश्यक खोप उपलब्ध नगराएपछि देशका विभिन्न स्थानीय तह आफैँले स्वास्थ्य मन्त्रालयसँग खोप किन्न अनुमति माग्ने गरेका छन् । यसअघि स्याङ्जाको वालिङ नगरपालिकाले समेत खोप किन्न मन्त्रालयसँग अनुमति माग्दै पत्राचार गरिसकेको छ ।