पोखरा । कोरोनाको दोस्रो लहर सुरु भएसँगै सरकारी अस्पतालमा कोरोना संक्रमितको चाप ह्वात्तै बढ्यो । धेरैको रोजाइ पर्ने पोखरा स्वास्थ्य विज्ञान प्रतिष्ठान (गण्डकी अस्पताल) मा इमर्जेन्सीमै राखेर कोरोना संक्रमितको उपचार गरिएको थियो । अस्पतालले मेडिकल वार्डलाई यसअघि नै अक्सिजनसहितको आइसोलेसन वार्डमा विकास गरिसकेको छ । अस्पतालमा संक्रमितको उपचारका लागि हाल ८० बेड आइसोलेसन छ ।

यसैबीच, स्वास्थ्य तथा जनसंख्या मन्त्रालयको आपतकालीन तथा विपत व्यवस्थापन समितिले आइतबार अस्पताललाई पूर्ण रुपमा कोभिड १९ का संक्रमित हेर्ने गरी व्यवस्था मिलाउन परिपत्र गर्‍यो । पत्र अनुसार नै यस क्षेत्रमा सरकारीतर्फ सबैभन्दा ठूलो अस्पतालमा अब कोरोना संक्रमितको मात्रै उपचार हुने भएको छ ।

गत ५ वैशाखमा बसेको गण्डकी प्रदेश मन्त्रिपरिषद् बैठकले सो अस्पताललाई कोरोना संक्रमितको मात्रै उपचार गराउने अस्पताल बनाउन केन्द्र सरकारलाई सिफारिस गर्ने निर्णय गरेको थियो । सोही अनुरुप नेपाल सरकार सचिवस्तरको आइतबारको बैठकले क्षेत्रीय अस्पतालमा कोरोना संक्रमितको मात्रै उपचार गर्ने निर्णय गरेको थियो ।

यसैबीच, संक्रमितको उपचारमा आवश्यक प्रक्रिया पूरा गर्न पोखरा स्वास्थ्य विज्ञान प्रतिष्ठानले अस्पतालमा मंगलबारदेखि ओपिडी सेवा बन्द गर्दैछ । अस्पतालमा कुल ३ सय ५० बेड छन् ।

प्रतिष्ठानका तर्फबाट निर्देशक प्राडा भरतबहादुर खत्रीले सोमबार विज्ञप्ति जारी गर्दै अर्को सूचना वा आदेश नभएसम्म कोभिड १९ बाहेकका अन्य ओपिडी बन्द भएको जनाइएको छ ।

गम्भीर प्रकृतिका बिरामीको उपचारका लागि अस्पतालको इमर्जेन्सी सेवा भने यथावत रहने छ । मिर्गौलाका बिरामीका लागि डायलाइसिस पनि निरन्तर रहने निर्देशक डा. खत्रीले जानकारी दिए । ‘सबै बेडमा अक्सिजन पु¥याउन गाह्रो छ,’ उनले भने, ‘सिलिन्डरले जति भ्याउँछ, त्यति गर्दै व्यवस्थापन गर्दै जान्छौं ।’