राष्ट्रपतिले पदीय मर्यादा, गरिमालाई समाप्त पारी संविधान च्यात्नुभयो : कांग्रेस नेता रमेश लेखक

आदर्श समाज सम्वाददाता
जेठ ८, २०७८
Ramesh-Lekhak

पोखरा । राष्ट्रपति विद्यादेवी भण्डारीले प्रधानमन्त्री पदका दाबी नपुग्ने भनी लिएको निर्णयलाई नेपाली कांग्रेसले संविधानविपरीतको क्रियाकलाप भएको बताएको छ ।

राष्ट्रपति कार्यालयले कसैलाई पनि प्रधानमन्त्रीमा नियुक्त गर्न नमिल्ने निर्णय गरेको विज्ञप्ति मध्यरातमा जारी गरेलगत्तै कांग्रेस नेता रमेश लेखकले भने, ‘यो निर्णयले राष्ट्रपति पदको मर्यादा, गरिमालाई समाप्त पारी संविधान च्यात्नुभएको छ ।’

सांसदहरुको हस्ताक्षरसहित दाबी गएपछि हस्ताक्षरको सनाखतसमेत नगरी राष्ट्रपतिबाट षड्यन्त्रमूलक काम भएको कांग्रेसले जनाएको छ । ‘राष्ट्रपतिले दुईवटा दाबी आयो भन्नु नै असंवैधानिक हो’ लेखकले भने, ‘संविधानतः ओलीले प्रधानमन्त्रीका निम्ति दाबी नै गर्न पाउनु हुन्न । यो देशबाट गणतन्त्र गयो भने विद्यादेवी भण्डारीकै कारणले जाने छाँटकाँट देखियो ।’

उनले भने, ‘यो संविधान र लोकतान्त्रिक मान्यताप्रति ठाडै आक्रमण हो । राष्ट्रपति र प्रधानमन्त्रीले पदको चरम दुरुपयोग गरेका छन् । उहाँहरुको हातबाट अब संघीय लोकतन्त्र र संविधानको संरक्षण हुन सक्दैन ।’ बरिष्ठ अधिवक्ता दिनेश त्रिपाठीले ‘कुनै परामर्श नगरीकन प्रथम दृष्टिमै जसरी विज्ञप्ति जारी भयो, यो पूर्णतः गैरसंवैधानिक भएको’ बताए ।

‘यो संविधानको मर्म–भावनाविपरित छ’ उनले भने, ‘त्यसमा पनि दल त्याग वा राजनीतिक दलसम्बन्धी व्यवस्था संविधानको ७६ ९५०मा आकर्षित हुँदैन । यो भनेको एउटा व्यक्तिले सरकार बनाउने सबाल हो । सांसदलाई व्यक्तिगत हिसाब उनीहरुको समर्थन जुट्यो भने राष्ट्रपतिले कसले कुन दल त्याग ग¥यो, कसको संसदीय दलले मान्यता दियो या दिएन भनी हेर्ने अधिकार प्राप्त छैन ।’

Related News

सम्बन्धित समाचार

hero news full width