पोखरा ।  प्रमुख प्रतिपक्षी दल नेपाली कांग्रेसले राष्ट्रपति विद्यादेवी भण्डारीविरूद्ध महाभियोग लगाउन कांग्रेस तयार देखिएको छ।

शुक्रबार सभापति शेरबहादुर देउवाको निवास बूढानीलकण्ठमा बसेको पदाधिकारी र पूर्वपदाधिकारीको बैठकमा महाभियोगका बारेमा छलफल भएको छ। राष्ट्रपति र प्रधानमन्त्रीले संविधानको भावना र मर्मविपरीत काम गरेको बैठकको निष्कर्ष छ। ‘बैठकमा महाभियोगबारे छलफल भएको छ। हामी एकमतले महाभियोग लगाउन तयार छौं,’ पौडेलले भने।

राष्ट्रपतिले सरकार गठन गर्न दिएको समय अघि नै राष्ट्रपति भण्डारी र प्रधानमन्त्री केपी ओलीको संविधान मिचाहा प्रवृत्तिविरुद्ध कांग्रेस चुप लागेर नबस्ने पौडेलको भनाइ थियो।

यसैबीच, कांग्रेसले सर्वदलीय बैठक बोलाएको छ।सभापति देउवाको निवासमा बसेको पदाधिकारी बैठकले संविधान र लोकतन्त्र रक्षाका लागि छलफल गरी आवश्यक रणनीति तय गर्नुपर्ने भएको सर्वदलीय बैठक बोलाउने निर्णय गरेको हो।

‘प्रधानमन्त्रीले राजीनामा दिएका छैनन्। थोरै समय दिएर अर्को सरकार गठन गर्ने भनेर जालसाजी भइरहेको छ। संविधान बचाउन सबै पार्टीसँग हामी कुरा गर्दैछौं। अनि ठोस कदम चाल्छौं,’ वरिष्ठ नेता रामचन्द्र पौडेलले भने।