स्याङ्जा । फेदीखोला गाउँपालिकाले कक्षा ८ को नतिजा अनलाइन्बाट प्रकाशन गरेको छ । बढ्दो कोरोना संक्रमणलाई मध्यनजर गर्दे अनलाइनमार्फत् नजिता प्रकाशन गरेको पालिकाले जनाएको छ ।

अनलाइनबाट गरिएको नतिजालाई पालिकाले आफ्नो वेबसाइटमा राखेको छ । कोरोना संक्रमणका बेला विद्यार्थी तथा अभिभावकले घरमै बसेर नजिता थाहा पाउन सकून भन्ने उद्देश्यले अनलाइनबाटै नतिजा प्रकाशन गरेको पालिकाका अध्यक्ष घनश्याम सुवेदीले जानकारी गराए ।

‘एसइईकै मोडलमा कक्षा ८ को नतिजा प्रकाशन गरेका छौं । पालिकाको वेबसाइटमा गएर विद्यार्थीले सिम्बोल नम्बर र जन्म मिति टाइप गरेपछि नतिजा हेर्न सक्छन् ।’ अध्यक्ष सुवेदीले भने ‘ मार्कसिट सहितको नजिता हेर्न र प्रिन्ट गर्न पनि सकिन्छ ।’

पालिकाले भर्चुअल माध्यमबाट शिक्षा समितिको बैठक बसेपछि नजिता प्रकाशन गरेको हो । फेदीखोलाले प्रविधिको क्षेत्रमा आफूलाई क्रियाशील बनाएको छ । प्रविधिसँग शिक्षालाई जोड्न शिक्षकलाई ल्यापटक अभियान पनि सञ्चालन गरेको थियो ।

वैशाख १६ गतेदेखि आधारभूत तहको परिक्षा सञ्चालन गरेको शिक्षा शाखा प्रमुख रामचन्द्र गुरुङले बताए । कक्षा ८ मा सहभागी २ सय ३० मध्ये सबै उत्तिर्ण छन् । तर, ग्रेड भने फरक फरक छ ।

बढ्दो संक्रमणका समयमा सूचना प्रविधिको प्रयोग गर्दे पालिकाले विद्यार्थीको अध्ययनप्रति चासो बढाएको छ । पालिकाभित्रका २७ वटा विद्यालय छन । तीमध्ये ९ वटा सामुदायिक र २ वटा संस्थागत विद्यालयबाट कक्षा ८ का आधारभूत परीक्षामा सहभागी रहेको पालिकाले जनाएको छ ।