म्याग्दी । म्याग्दीको बेनी अस्पतालमा कोरोना संक्रमित बिरामीको उचारको लागि अक्सिजन सहितको आइसोलेसन कक्ष सञ्चालनमा ल्याइएको छ । कोरोना संक्रमित बढेसँगै अस्पतालमा बेड अभाव हुन थालेपछि अस्पतालको निर्माणाधिन भवनमा तयार पारिएको २० बेड क्षमताको आइसोलेसन कक्ष आइतबारदेखि सञ्चालनमा ल्याइएको हो ।

गण्डकी प्रदेश सरकारको १५ लाख र बेनी नगरपालिकाले उपलब्ध गराएको ५ लाख गरि २० लाख रुपियाँ खर्चिएर सुविधासम्पन्न आइसोलेसन बनाइएको छ । आइसोलेसन कक्षमा यसअघि बेनी नगरपालिका र अस्पतालले खरिद गरेका बेड प्रयोगमा ल्याइएको छ ।

कोरोना भाइरस संक्रमण फैलिन क्रम रहेको र संक्रमित थपिदै जाँदा बेडको अभाव नहोस भनेर अक्सिजन सहितको आइसोलेसन कक्ष निर्माण गरिएको अस्पताल व्यवस्थापन समितिका अध्यक्ष बेलबहादुर कटुवालले बताए ।

आइसोलेसन सञ्चालन आएसँगै बिरामीको उचारमा सहज भएको छ । निर्माणधीन भवनको तल्लो तल्लामा रहेका ५ वटा कोठालाई व्यवस्थापन गरेर आइसोलेसन बनाइएको छ । अस्पतालमा रहेको अक्सिजन उत्पादन केन्द्रबाट बिरामीको बेड सम्म नै पाइपबाट अक्सिजन पुर्‍याउने तयारी गरिएको छ ।

आइसोलेसन कक्ष सञ्चालनमा आएपछि कोरोना संक्रमित विरामीहरुलाई उपचार गर्न सहज भएको छ । जिल्लामा कोरोना संक्रमणको दर बढ्दै गएपछि आगमी जेठ १० सम्म लकडाउन जारी गरिएको छ । कोरोना रोकथाम तथा नियन्त्रणका लागि म्याग्दीका सबै स्थानीय तहले यस अघिको अस्थायी कोरोना अस्पताल पनि पुन सञ्चालनमा ल्याएका छन् ।