मनाङ–मुस्ताङका संक्रमितको संकट : चर्को शुल्कमा हेलिकोप्टर चार्टर

प्रकाश ढकाल
जेठ १, २०७८
manang mustang

पोखरा । अस्पताल बन्दै छ । आइसियु कक्ष छैन । प्रदेश सरकारले पठाएको २ मध्ये एउटा भेन्टिलेटर जोडिएको छ । त्यो पनि प्राविधिक नभएकोले त्यसै थन्किएको छ । मनाङमा अहिले ४३ जना सक्रिय संक्रमित उपचाररत छन् । डाक्टर छैनन्, स्वास्थ्यकर्मी पनि निकै कम । कोभिडको बढ्दो ग्राफ थेग्न मुस्किल पर्दै गएको छ । बिरामीहरु संक्रमण देखिएपछि चर्को मूल्यमा हेलिकोप्टर चार्टर गरेर पोखरा र काठमाडौंका अस्पतालमा पुगेका छन् । ‘एउटा भेन्टिलेटर छ । प्राविधिक नभएको हुनाले चलाउन सकिएको छैन । ठाउँ नभएर आइसियु सञ्चालन हुन सकेको छैन,’ प्रमुख जिल्ला अधिकारी विष्णुप्रसाद लामिछानेले भने, ‘चामेले आइसोलेसन बेड तयार गरेको छ । अरु स्थानीय तहले पनि कोभिड अस्पताल भनेर बनाएका छन् । तर डाक्टर छैनन् । सामान्य स्वास्थ्यकर्मीको भरमा चलिरहेका छौं ।’

मनाङका २ जना बिरामी पोखरा र एकजना काठमाडौंमा हेली चार्टर गरेर पुगेका छन् । ‘बाटो राम्रो छैन । भएको दुईवटा एम्बुलेन्सले पनि खासै काम दिँदैन । बिरामीको स्वास्थ्य कमजोर हुँदै गए हेलिकोप्टरको विकल्प छैन,’ लामिछाने भन्छन्, ‘वास्तवमा दुखद समय व्यहोरिरहेका छौं । हाम्रा लागि कोरोना भारी पर्दै छ ।’ उनका अनुसार अक्सिजनको अभावसमेत बढ्दै छ । ‘कम्तीमा भेन्टिलेटर मात्रै चलाउन सके पनि धेरै आधार हुन्थ्यो । हेलिकोप्टरमा जानुपर्ने बाध्यता हुँदैनथ्यो,’ उनले भने, ‘अक्सिजन र स्वास्थ्य उपकरण तयारी अवस्थामा राखौं भनेर जोहो गर्न स्वास्थ्यकर्मीलाई पोखरा पठाएका छौं ।’ स्वास्थ्य कार्यालयका प्रमुखसहितको टोली अहिले पोखरामा अक्सिजन सिलिन्डर र औषधीको खोजीमा छ ।

स्वास्थ्य उपकरण र चिकित्सक नहुँदा हिमालपारीका जिल्लाका कोरोना संक्रमित हेलिकोप्टर चार्टर गर्नु बाध्यता छ ।

स्वास्थ्य उपकरण र चिकित्सक नहुँदा हिमालपारीका जिल्लाका कोरोना संक्रमित हेलिकोप्टर चार्टर गर्नु बाध्यता छ । मुस्ताङमा यतिबेला ६३ संक्रमित छन् । ४ जनालाई हेलिकोप्टरबाट पोखरा ल्याएको सांसद इन्द्रधारा विष्टले जानकारी दिए । ‘पहिले भन्दा दोब्बर महंगो भाडा छ । स्वास्थ्यकर्मीहरु पनि लगेर बिरामी ल्याउनुपर्छ,’ उनले भने, ‘डेढ/२ लाखमा उड्ने हेलिकोप्टरले यो बेला ५ लाखसम्म माग्छन् । बिरामीको ज्यान बचाउन भन्दा पैसा ठूलो भएन, के गर्नु ?’ यसअघिको कोभिड संक्रमणको बेला यी २ जिल्ला करिब सुरक्षित थिए । यसपालि केही सीप लागेन, कोरोना झन् माथि माथि चढ्दै गयो । दैनिक संक्रमित थपिँदै जाँदा मानसिक त्रास उस्तै थपिएको छ ।

जिल्लामा राम्रो उपचार नपाएर सहर झरेका बिरामीलाई यता पनि राम्रो उपचार छैन । सबैजसो अस्पताल भरिएका छन् । पर्याप्त सिलिन्डर नहुँदा अक्सिजन अभाव सुरु भइसकेको छ । जिल्लाका स्थानीय तहहरूले आइसोलेसन वार्ड तयार पारिरहेका छन् । कतै कोभिड अस्पताल पनि बनेका छन् । तर, स्वास्थ्यकर्मी छैनन् । हिमालपारीका जिल्लासँगै उत्तरी गोरखाको अवस्था पनि जटिल छ । दैनिकजसो बिरामीहरु हेलिकोप्टर चार्टर गरेर सहरी क्षेत्रमा झार्नुपर्छ । मनाङ, मुस्ताङका अधिकांश स्थानीय तहको काम संक्रमणका कारण ठप्प भएको छ भने बाहिरबाट मान्छे छिर्न रोक लगाइएको छ । स्वास्थ्य उपकरणमा सरकारले उतिसारो चासो नदिँदा दुख भोगिरहेका छन्, विकटका नागरिकहरु ।

गण्डकी प्रदेश सरकारले अघिल्लो वर्ष सबै जिल्ला अस्पतालमा भेन्टिलेटर सहितको आइसियु कक्ष तयार गर्न १४ करोड रुपैयाँ विनियोजन गरेको थियो । अधिकांश अस्पतालले सामान खरिद गरे पनि प्राविधिक नहुँदा जडान नगरी थन्क्याएर राखेका छन् । कतिपय ठाउँमा आइसियु कक्ष बनाउने भवन छैन । भवन भएर जोडिएका उपकरण प्रयोग गरिएका छैनन् । मनाङ र मुस्ताङमा २/२ बेड तथा अरु जिल्लामा ५ बेडका दरले आइसियु कक्ष बनाउन लागिएको थियो । सोही समयमा गाडी किन्न दिइएको पैसा सबै खर्च भइसकेको छ, तर उपकरण खरिद केही अस्पतालले अझै सकेका छैनन् ।

Related News

सम्बन्धित समाचार

    hero news full width

    sanil ads

    wordlink ads