पोखरा । जनमोर्चा नेपालले कृष्ण थापालाई गण्डकी प्रदेश सभा संसदीय दलको नेताबाट हटाएको छ ।

थापाले दलको निर्देशन विपरीत काम गरेकाले दलको नेताबाट हटाइएको महासचिव मनोज भट्टले बताए ।

यो बारेको पत्र सचेतक पियारी थापामार्फत संसद सचिवालयमा दर्ता भइसकेको छ । उनलाई अब सांसद पदबाट हटाउने बारेमा पनि तयारी भइरहेको पार्टीले जनाएको छ ।

उनलाई सांसद पदबाट नहटाएसम्म गठनवन्धनले सरकारका लागि दाबी गर्ने आधार नपुग्ने भएको छ । त्यसका लागि अहिले ४ बजेसम्मको समय छ ।

वहुमतको सरकार बन्न नसके आजै प्रदेश प्रमुखले पृथ्वीसुब्बा गुरुङलाई पुन नियुक्ति गर्ने छिन् ।

यसैबीच  जनमाेर्चाका सांसद  कृष्ण थापाले आफूलाई पार्टीले प्रष्टीकरण नसाेधकाे बताएका छन् ।

आफू बागलुङ घर गैसकेकाे भन्दै उनले, कुनै नेताले फाेन नगरेकाे बताए । `मलाई कसैले फाेन गरेकाे छैन । मैले नि गरिनँ,´ उनले भने, `म बागलुङ जैमिनी घरमा छु । बिहान ७ बजे आएकाे हुँ ।´

कांग्रेसलाई साथ दिन नसक्ने भनेर उनले पार्टी ह्वीप नै उल्लंघन गरेका छन् । उनी आफूले कुनै गलत सम्झाैता नगरेकाे बताएका छन् ।

`सरकारमा जान्न । कुनै गलत नियतले सम्झाैता गरेकाे पनि छैन,´ थापा भन्छन्, `मलाई मेराे मनले कांग्रेसलाई सघाउन दिएन । हस्ताक्षर गरिनँ ।´ । कुनैपनि हालतमा विपक्षीलाई सरकार बनाउने प्रश्तावमा हस्ताक्षर नगर्ने उनकाे भनाई छ ।