पोखरा । फेवातालका पुराना डुंगा चालक हुन्, सुन्दर विश्वकर्मा (५२) । उनले डुंगा चलाउन थालेको ३२ वर्ष भो । यतिका लामो समयसम्म डुंगा खियाएका सुन्दरलाई अहिलेजस्तो बेचैनी कहिले भएको थिएन । त्यसको प्रमुख कारण थियो–कोरोना भाइरस महामारी । कास्कीमा गत वैशाख १५ देखि ३१ सम्म जारी निषेधाज्ञाले उनले डुंगा चलाउन पाएका छैनन् । बीचमा केही समय तङ्ग्रिन थालेको व्यवसाय फेरि चौपट्ट छ ।
कोरोनाको जोखिमका कारण १४ महिनाअघि पनि डुंगा साङ्लोमै बाँधेर घरमै बसेका थिए । सरकारले असोजदेखि आंशिकरुपमा खोलेपछि फाट्टफुट्ट काम पाएका थिए । कोरोनाको दोस्रो लहरसँगै उनीमाथि पनि दोस्रो कहर सुरु भएको छ ।
नेपालको पूर्वी जिल्ला सिन्धुलीबाट सुन्दर २०४५ सालतिर कामको खोजीमा पोखरा आएका थिए । सिन्धुलीको सलपाबाट आएका उनी फेवामा डुंगा चलाउने त्यस भेगका सबैभन्दा पुराना चालक हुन् । उनी यहाँ आएपछि धेरै जना सलपावासी फेवामा डुंगा चालक बने । सुन्दर भन्छन्, ‘पूर्वबाट फेवामा डुंगा चलाउन आउने म पहिलो हो । पछि धेरै जना आए । तर यतिका समय बितिसक्दा अहिलेजस्तो अवस्था कहिल्यै भएन ।’ वाराहीघाटमा तैरिने आफ्नो नामका ५ डुंगाले उनको परिवारको गुजारा चल्दैआएको छ ।
२०७६ चैत ११ देखि लकडाउनका कारण डुंगा चल्न रोकिएकोमा संक्रमण दर केही घटेपछि २०७७ असोज १ देखि आंशिकरुपमा चल्न थालेका थिए । त्यसबेला तालवाराही मन्दिरमा प्रवेश निषेध भएकोले मन्दिर वरिपरि घुमाउन र ताल सयर गर्नेहरुले भाडामा लिने गरेका थिए ।
फेवा डुंगा व्यवसायी समितिले फेवामा डुंगा चलाउन आलोपालो प्रणाली लागु गरेको छ । तालका विभिन्न ८ घाटमध्ये सबैभन्दा बढी वाराही घाटबाट ३ सय ५६ डुंगा चल्छन् । वाराही घाटबाट मन्दिरसम्म जान आउन सातादश दिनमा मात्र पालो आउँथ्यो । पछि पुस १० देखि मन्दिरसम्म पनि आवातजावात खुला भएसँगै आन्तरिक पर्यटकको घुइँचो बढेको थियो । डुंगा चालकमा खुसीको सञ्चार सुरु भएकोमा पुनः लकडाउन (निषेधाज्ञा) ले कठिन मोड निम्त्याएको हो । समिति अध्यक्ष बुद्धिबहादुर नेपालीले भने, ‘पोहोर पुस १० देखि राम्रै भएको थियो । मान्छे आउन थालेका थिए । तर अहिले त च्याप्पै भयो । पहिले झैं राहतको खोजी गर्नुपर्ने अवस्था छ ।’
डुंगा व्यवसायी समितिका कर्मचारी सन्देश गिरीका अनुसार पछिल्लो समय ७५ प्रतिशत सुध्रिसकेको थियो । फेरि बन्द हुँदा कोही साथीहरु गाउँतिर गएका छन् भने कोही कोही माछा मारेर दिन कटाएका छन् । उनका अनुसार वाराही घाटबाट वैशाख १५ अघिसम्म मन्दिर घुम्न १ सय जति डुंगा चल्ने गरेका थिए भने भाडामा ५० वटा जति जान्थे । विदेशी पर्यटक अभावै पनि आन्तरिक पर्यटकले धानेका थिए ।
‘निम्न आएका मानिसले छाक टार्ने माध्यम डुंगा पेसा हो । अहिले फेरि यस्तो बेला आयो,’ समिति अध्यक्ष मंगलबहादुर नेपाली अनिश्चय भावमा बोल्छन्, ‘कोरोना कहिले हट्छ र सजिलो होला खै ?’
फेवाताल ५ सय जना डुंगा चालक छन् । सबैभन्दा बढी वाराहीघाटमा मात्रै करिब ८० जना छन् । डुंगा चलाएरै रोजीरोटी चल्ने गरेकोमा कोरोनाकै कारण उनीहरुको गाँस गुम्दै जाने डर छ । विगतमा वडा तथा विभिन्न संघसंस्थाको पहलमा राहत बाँडिएकोमा अहिले भने कसैको पहल भएको छैन ।
फेवातालमा डुंगा व्यवसाय व्यवस्थापनका लागि २०५१ सालमा उनकै अध्यक्षतामा फेवा डुंगा व्यवसायी समिति गठन भएको हो । फेवामा विभिन्न ८ वटा घाटमा हाल ८ सय वटा डुंगा चल्छन् । फेवातालमा वाराहीघाट सहित गौरीघाट, अम्बोट, फिस्टेल, पहारी, फेवा, स्वीमिङ पुल र बंगलादी घाट छन् ।
Related News
सम्बन्धित समाचार
चुमानलाई अर्थ, मनाङेलाई भौतिक पूर्वाधार मन्त्रालयको जिम्मा
हेमराज पहारी स्मृति पुरस्कारबाट सरुभक्त पुरस्कृत
गण्डकी प्रदेश सभाको बैठक अनिश्चितकालका लागि स्थगित
चोटिलो बन्दै गण्डकीको संसदीय राजनीति
पुरानो पोखरा जोगाउन पहल: मेयर आचार्य
hero news full width
मुख्य समाचार
सुदुरपश्चिममा सोडारी मुख्यमन्त्री नियुक्त
प्रेमील गजलकारको भावपूर्ण बिदाइ
वैशाख ५, २०८१अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
वैशाख ५, २०८१गण्डकी प्रदेश सभाको अधिवेशन आह्वान
वैशाख ५, २०८१गण्डकीमा अधिवेशन डाक्न सिफारिस, मुख्यमन्त्रीले विश्वासको मत लिँदै
वैशाख ५, २०८१दृष्टिविहीनलाई बाटो देखाउँदै गुगल
वैशाख ४, २०८१