पोखरा । गण्डकी प्रदेश सभामा अविश्वासको प्रस्तावमाथि मतदान हुने दिन एकाएक बिरामी परेका गण्डकी प्रदेश सभा सदस्य राष्ट्रिय जनमोर्चाका खिमविक्रम शाही कोरोनामुक्त भएका छन् ।

सांसद शाहीको रिपोर्ट शुक्रबार नेगेटिभ आएका उनको सचिवालयले जनाएको छ ।

वैशाख १५ गते सांसद शाहीमा कोरोना पुष्टि भएको थियो । कोरोना पुष्टि भएको नवौं दिनमा गरिएको परीक्षणमा उनको रिपोर्ट नेगेटिभ आएको हो ।

४ रात चरक अस्पतालमा बसेका उनी १९ गतेबाट होटेलमा सरेका थिए । उनी आइतबार डेरामा जानेछन् ।

मुख्यमन्त्री पृथ्वीसुब्बा गुरुङविरुद्ध दर्ता भएको अविश्वास प्रस्तावमाथि मतदान हुन दिन सांसद शाही बेपत्ता भएको भन्दै उनकै दलकी सचेतक पियारी थापाले संसद सचिवालयमा पत्र दर्ता गराएकी थिइन् ।

उनकै पत्रका आधारमा विशेष अधिवेशनको बैठक स्थगित भएको थियो ।