पोखरा । लामो समयको खडेरीका कारण खेतीबाली सुक्न थालेपछि पोखरा महानगरपालिका ३३ भरतपोखरीका विभिन्न स्थानमा शनिबार समूहिक पूजा गरिएको छ ।

स्थानीय सिलिंगे चेतना महिला समूहको प्रमुख संकल्पमा यहाँका साविक भरतपोखरी गाविस का वडा नं ५ र ६ मा पर्ने चण्डी देउराली, कोटभैरव, नाउरुङ, व्यार्थोक र मैदानमा छुट्टाछुट्टै पूजा गरी पानी मागिएको समूहकी सचिव सीता केसी महतले जानकारी दिइन् । परापूर्व कालदेखि लामो समय खडेरी परेमा यहाँका यी शक्तिपीठहरूमा सामूहिक पूजाआजा, भजनकीर्तनसहित पानी माग्ने प्रचलन रहेको उनले बताइन् । पूजाआजासहित पानी मागेका अवस्थामा न्यूनतम १ हप्ताभित्रमा पानी पर्ने गरेको जनविश्वास कायमै रहेको छ ।

सामूहिक पूजाकै अवसर पारी स्थानीय विष्णु पौडेलले आफ्नी छोरी स्व. आरती पौडेलको स्मृतिमा चण्डी देउराली मन्दिरमा घन्टी प्रदान गरेको समूहकी अध्यक्ष कर्णकुमारी महतले जानकारी दिइन् । लामो समयदेखि पानी नपरेका कारण खेतबारी लगाइएको मकैलगायत अन्य तरकारी बाली सुक्न थालेपछि किसानहरू समस्यामा परेका छन् । खडेरीकै कारण वरपरका प्राकृतिक जलाशयमा समेत पानी सुक्दै जाँदा दैनिकी सञ्चालनमा समेत समस्या परेको स्थानीयको दुखेसो छ । यहाँका कोटभैरव, चण्डी देउरालीलगायत शक्तिपीठको अस्तित्व नेपालका बाइसे चौबीसे राजाका पालादेखि नै भएको मानिने भएकाले सामाूहिक पूजाआजासहित पानी माग्ने प्रचलन पनि त्यही समयदेखि नै भएको हुनसक्ने बूढापाका बताउँछन् ।